周柏豪前晚在澳門新濠影滙開騷，與性感女Dancer共舞的他突然被對方使出「擒拿手」上下狂摷，加上對方跪在他前面時，向下望就能一睹洶湧上圍，嚇得他當堂甩嘴！
首次在澳門開騷的柏豪，表現興奮全程落力彈唱。
【勞子軒澳門直擊】歌手周柏豪前晚於澳門新濠影滙綜藝館舉行《Pakho Perfect 8 Macau Live 2015》，並邀得樂隊Dear Jane及連詩雅做嘉賓。首次在澳門開騷的柏豪，在唱畢《只有一事不成全你》時，樂隊刻意延長尾奏，而他則站在台中輕聲自語並眼泛淚光。他強忍淚水表示：「過去嘅11月有兩個朋友離開，一個因交通意外，另一個係發燒入院，幾個鐘後就離開咗，咩都冇交代。佢係我入行前已認識，我每次開騷佢都會買飛入場睇，但今次好可惜佢唔喺現場。」
一睹洶湧高「峰」
柏豪其後收拾傷感，在Encore部分與着性感Boxing衫的女Dancer互動，對方更突然攬住柏豪，又跪在他跟前摸足全身，當她貼近柏豪下半身時更讓他嚇到甩嘴！柏豪在完騷後受訪，談到被女Dancer摸身致甩嘴，他直言事前未看過對方正式的演出服裝，沒預料到如此性感：「排舞嘅Otto叫個女仔到時盡摷，冇諗過佢咁盡，咁就甩咗！」他更笑指一低頭就發現女Dancer爆乳上圍，即嚇到不敢再望。
樂隊Dear Jane及連詩雅為柏豪個唱任嘉賓。
性感女Dancer不時與柏豪埋身互動。
柏豪提到近日有兩位好友離世時一度感觸落淚。
from:
http://orientaldaily.on.c ... /00282_006.html
