堪輿學家蘇民峰前日黃昏喺facebook貼文，狂呻前日原本搭港龍3點幾機離港，佢兩點幾check in後因為未知登機閘口，所以去貴賓候機室等，點知等到飛機飛走咗都唔知，質疑點解會冇廣播。唔少網民激烈留言話留意登機閘口同時間係乘客責任，蘇民峰反指網民無知，話對方或者未坐過港龍或者未入過lounge，結果辣㷫更多網民。
之後蘇民峰懷疑有航空公司職員踩場話：「明明係員工（指網民），做乜咁鬼鼠（祟）唧，而且我根本沒有開航空公司的名，根本不是要投訴誰。」點知有網民將佢之前嘅留言cap圖，證實佢講咗四次坐KA，即係港龍客機，叫佢唔好自打嘴巴。而蘇民峰隔咗10個鐘後再貼文，指人要接受批評，檢討對錯先有改善空間，之後就冇再回應網民留言。
容祖兒同受害
另外，容祖兒同薛凱琪前日喺馬來西亞返港，同樣受颱風影響延誤行程，本來前晚到港嘅薛凱琪（Fiona），仲搞到噚日下晝先返到嚟。佢喺Instagram又攰又餓咁留言：「總共在廣州飛機裡沒東西吃的情況下等了10個小時，終於起飛了。這是甚麼回事！等我回到香港的時候，紐約都能去了。」祖兒則延誤兩粒鐘，佢仲識講笑話好彩撞到盧海鵬。
撰文：馮仁昭
薛凱琪呆困機艙，淨係分得餅乾同清水。互聯網圖片
薛凱琪
馮仁昭
from:
http://hk.apple.nextmedia ... 151006/19321890
