今年38歲嘅陳伶俐，08年同林敏驄離婚後，大前年再嫁新加坡隱形富豪胡嘉烈後人劉頌銘，本來已同林敏驄生咗林肯（Lincoln）同林善（Yohji）嘅佢，上年7月再同劉頌銘生多個得意B仔，過住少奶奶生活。最難得係劉頌銘對老婆同前夫生嘅一對囝囝都好照顧，囝囝同繼父亦相處得好開心，成日影到佢哋一齊食飯。
其實，伶俐嫁入劉家前除咗娛樂圈工作，仲有搞得唔錯嘅公關公司生意，但做劉太后就專心相夫教子，所以老爺奶奶都好錫佢。不過，本報收到消息，因為劉頌銘好想伶俐幫佢生多一個，而佢為咗𠱁掂老婆肚皮再開工，最近就打本成千萬畀伶俐喺銅鑼灣開畫廊，下個月1號就開張喇！
伶俐嘅畫廊喺銅鑼灣禮頓道黃金地段，前日下晝大約5點，記者去現場睇過，發現間舖仲係圍咗木板寫住「Meda M.」同「Coming Soon」幾隻字，入面就有好多個師傅正在趕工交貨，約5點半就見到伶俐孖住老公同相信係設計師嘅四眼男入舖睇裝修，伶俐一入舖就捉住裝修師傅係咁講，好似好緊張咁，佢老公就同四眼男左望右望。
【睇裝修】
畫廊會喺下個月1號開張，唔怪得知陳伶俐前日一入舖即好緊張四圍睇裝修進度。
【落重本】
據知劉頌銘為咗𠱁老婆生多個，今次畫廊投資咗成千萬。
【大師級】
意大利畫家Massimo Meda來頭唔小，客戶唔止係有錢名人，仲有皇室貴族。
多名人皇室捧場
據知，劉頌銘今次投資過千萬買代理權嘅畫廊來頭唔小，全部出自意大利名畫家Massimo Meda手筆，呢個畫家擅長用改進嘅顏料，再配合獨特嘅3D技術，將一幅畫變成立體，每幅價錢由10萬至過百萬元都有，有好多名人同皇室成員捧場，就連上年4月被評選為一百位世界最有影響力人物之一嘅卡塔爾公主瑪雅薩（Sheikha Al-Mayassa）都同佢買咗幾十張畫，認真犀利。
雖然伶俐噚日喺電話度話唔想講咁多，要等開張先講，但佢把聲就明顯好開心，問佢係咪因為老公想佢生多個，所以打本畀佢做生意？伶俐笑住話：「嘩，其實係兩件事嚟㗎喎！我哋想將歐洲嘅藝術文化帶嚟香港，咁首先生咗呢個畫廊BB先，遲啲希望上天再送個BB女畀我啦！」
採訪：畢紹基、潘冠恩
from:
http://hk.apple.nextmedia ... 150917/19297895
