陳伶俐同邵美琪係麻雀腳，一同捲入緋聞之中。
陳伶俐、邵美琪（Maggie ）同李香琴，噚日為一間時裝品牌喺佐敦道舉行嘅時裝表演擔任嘉賓，大會仲特登將表演安排喺一間老式茶餐廳舉行。陳伶俐一到場就俾追問關於同林敏驄離婚嘅事，佢亦都好大方承認，佢話：「咁遲至出嚟係想過咗啲風風雨雨先，目前生活好開心，其實啲細路開心我就開心，佢哋而家都開晒學。」
陳伶俐話佢兩個仔都好懂事冇追問父母嘅事，佢話：「同林先生（林敏驄）都分開咗一段時間，同埋啲細路一向都習慣爹哋經常唔喺香港，所以已經慣晒，而且而家每個星期大家都會約出嚟見吓面，其實我哋嘅關係好好，仲係一家人。
離婚後負責湊仔嘅陳伶俐，同邵美琪分別與麻雀腳李成文傳出緋聞。《忽然1周》圖片
離婚後負責湊仔嘅陳伶俐，同邵美琪分別與麻雀腳李成文傳出緋聞。《忽然1周》圖片
「唔使避忌嘅」
另外，早前邵美琪俾人發現同陳伶俐其中一位緋聞男友、火車頭越南餐廳嘅老闆李成文一齊，伶俐話：「其實我真係想講清楚，佢（李成文）只係我同Maggie 啲麻雀腳，仲要係唔夠腳至搵佢戥腳過種，好唔好意思搞到佢捲入我離婚嘅事。」
至於無辜被牽涉入內嘅Maggie 就對傳言一笑置之，佢話：「我哋係朋友兼麻雀腳，不過因為我嘅職業搞到人哋尷尬，我覺得唔好意思，人哋開餐廳啲嘢又咁好食，食嘢咪會去咋，唔使避忌嘅！」此外，早前被指身體出現問題嘅琴姐就同在場人士大派定心丸，琴姐話：「我聽晒醫生嘅話，而家完全冇問題，好多人都好有心專登打電話問候我。」
陳伶俐同邵美琪見到之前傳出有病嘅琴姐，即刻關心問候對方。
[
本帖最後由shingling 於2008-9-1810:25編輯]
