傳已秘婚但否認嘅邵美琪（Maggie），同男友施祖男經常出雙入對，好似見少一陣都唔得，不過近排Maggie要幫TVB拍新劇《守業者》，所以少咗陪男朋友。不過日前Maggie出席完活動，就即刻同男友揸車去咗大坑撐枱腳食晚飯。佢哋去咗一間叫浜燒大將嘅地方食爐端燒。
與師傅吹水鞠躬
戴住帽嘅Maggie同施祖男，入到去之後就揀咗個大堂中央位坐，跟住施祖男就叫咗一枱串燒畀女友嘆，除咗基本嘅燒雞翼、雞串同牛肉之外，佢哋仲叫咗唔少海鮮，包括蠔、大蜆同榮螺，Maggie就不停食，食到不知幾滋味，男友就不時講電話。
Maggie同男友食到大概10點左右就飽，可能佢哋係熟客，所以離開嘅時候，餐廳嘅兩位日籍師傅仲送佢哋出門口，幾個人喺門口傾咗幾分鐘仲互相鞠躬。食到心滿意足嘅邵美琪心情極靚，走嘅時候仲四萬咁口，同男友十指緊扣咁去攞車走人。
【煙韌開餐】
【拖實鞠躬】
【做柴可夫】
邵美琪同男友施祖男日前食完爐端燒，十指緊扣行去攞車。
from:
http://hk.apple.nextmedia ... 131009/18455483
