【全家出巡】
陳伶俐日前孖住同前夫林敏驄生嘅林肯、林善，加埋老公一行四人喺銅鑼灣食飯。
【銅鑼灣】有仔真係要趁嫩生，好似08年同林敏驄離婚，結束10年婚姻關係嘅陳伶俐，22歲開始生仔，除咗同林敏驄生嘅兩個仔，大前年改嫁新加坡隱形富豪胡嘉烈後人劉頌銘，上年再生多個得意B仔，今年38歲就已經係三子之母，認真犀利。
陳伶俐同林敏驄離婚後獲兩個仔撫養權，據知今年16歲嘅大仔林肯（Lincoln）同11歲細仔林善（Yohji），同繼父劉頌銘相處得好好，日前本報就喺銅鑼灣巧遇佢哋「一家四口」嘆咖喱，Lincoln同劉頌銘唔單止十分好傾，而且全晚都黐住呢位「哎吔爹哋」，感情不淺！
【食唔停口】
林肯、林善同繼父好好傾，陳伶俐就只顧食冇搭嘴。DV圖片
【餅印兄弟】
林肯（右）、林善樣子似足林敏驄，尤其林善肥嘟嘟直頭餅印一樣。
街坊裝出巡
當晚大約7點，束馬尾、一身街坊裝嘅陳伶俐，撇甩同劉頌銘生嘅8個月大B仔，帶住Lincoln、Yohji同老公一齊去銅鑼灣搵食，最後一行四人去咗邊寧頓街一間專食咖喱嘅餐廳食晚飯。
由於餐廳位於馬路邊，劉頌銘當晚直接將車停泊喺餐廳門口，陳伶俐落車後同Yohji先入去攞位，Lincoln就唔介意吸二手煙，陪劉頌銘喺門口煲煙，然後先入餐廳。
食飯期間，見兩兄弟同劉頌銘好好傾，三個人成日講到哈哈笑，反而陳伶俐就冇乜搭嘴，全程不停食，食完就拿拿臨埋單走人，不過劉頌銘煙癮都幾大，飯前飯後唔夠一個鐘，離開時又再點煙，今次陳伶俐就同埋兩個仔一齊陪佢慢慢煲，之後先一齊返上車走人。
採訪、攝影：李志明、陳辰、梁繼光
【飯前】
飯都未食，劉頌銘已經食支煙先，林肯全程黐到實。DV圖片
【飯後】
劉頌銘煙癮都幾大，食完飯全家企喺街陪佢食煙。
from:
http://hk.apple.nextmedia ... 150427/19126434
