李逸朗(Don)因為用哭腔唱《儍女》，人氣暴升，而咁啱嗰陣時，Don嘅舊拍檔蔣雅文(Mandy)，突然宣佈已經低調地成為咗人妻，所以網上就有個都市傳說，話Don用哭腔唱《儍女》，係因為蔣雅文嫁人了…
Mandy跟手馬上澄清，話同Don已多年沒有聯絡，而兩人關係，只屬拍檔，「這事實可能讓大家失望了，但我們之間真的不是那種關係」李襄王有冇心都好，Mandy都肯定無意。至於Don呢，之前被問到Mandy低調嫁人嗰陣，有點葡萄咁話，冇收到結婚通知:「冇呀，佢結婚點解要話我知呀？」之後再謂:「我諗佢揀得呢個老公，呢個老公一定係好識得關心佢，佢先至會揀。佢結婚嗰陣好低調，佢完全冇同我講……」但其實Don一直都有關心Mandy近況，之前女方自爆患上多囊卵巢綜合症，Don亦有留言慰問……
「知不知每晚想你十次百次
每晚也去等因我極心痴
可不可合力延續這故事
延續這片愛意一生兩相依…」《愛的故事上集》
Don曾經同Mandy翻唱過這首歌，但就未有合唱《愛的故事下集》——《但願他珍惜你》。而呢首歌，又不謀而合地，正正合了Don送給Mandy的心意。兩個在人生經歷上有翻天覆地改變的人，終於再聚頭，拍下了一張「世紀合照」，李逸朗將之貼上fb，輕輕寫道:「七年之約」。不過蔣雅文就未有貼上。拍攝地點，就是Mandy位於中環元創坊的期間限定店。
事有湊巧，Don貼圖之餘，在fb上又寫了一段文字，紀錄噚晚，與「新知己舊朋友」吃飯的心情。「聊起這幾年大家的故事，發現原來能讓我們在命運激流當中存活下來的，除了運氣就是大家都沒有放棄的堅持，最終我們都成長了(下略)。在這段時間，我天天禱告，為我求，也為你求，終於有天當我祈禱的時候，我穩約看到一張未見過的照片，那一瞬間，我好像明白了一些事。」咦……
「回想過去，起起落落，低著頭過一關，咬著唇又過一關，到底我得到了什麼呢？原來我得到的，是一個充滿信心的靈魂，是一雙不易動搖的眼睛，簡單的說，過去那六年都能活下來了，未來的生活，我憑什麼不能活得更好！？」
這位「新知己舊朋友」，可會是Mandy？答案：唔係。
Mandy話，冇同Don食飯，張「世紀合照」係昨日影嘅:「我冇同佢食飯啊！唔係我嚟！昨日佢有嚟PMQ幫襯，但我忙緊，傾兩句就離開了。畢竟快8年沒聯絡，大家追求的也不一樣，就是見到老朋友互相問候一下。」
而Don接受本報訪問時就話：「同我Mandy08年後都冇乜見，都有七年冇見，今次再見面感覺好犀利，好似返去Don and Mandy合唱年代，好年青咁，見佢嫁咗人後，人又靚咗，有自己事業，戥佢開心，見到佢同妹妹家庭式營運生意，我好羨慕，祝福佢，希望佢哋愈做愈好。」
Don又謂煙火嗰篇文章，食飯主人翁唔係Mandy，而係EO2的Eddie，佢話：「我同Eddie拍完戲，喺扒房食飯鋸扒，因為我哋一入行就識，但冇乜傾偈，所以嗰日有機會食飯，傾咗好多偈，我哋有成十年冇見，大家變化好大。」
from:
http://hk.apple.nextmedia ... 150806/19244905
