蔣雅文移居台北迴流開期限店

英皇前組合3T成員蔣雅文（Mandy）逃出香港娛樂圈後，轉戰台灣落地生根開店兼嫁人，但土生土長的Mandy仍然心繫香港，近日孖老公朱經雄返港在中環開設期間限定店。32歲的Mandy重踏故土覺得好陌生，她好想找回兒時印象中、很單純很可愛的香港：「香港對我嚟講係情意結，希望大家努力收復失地！」

香港人近年嚮往出走台灣，前3T成員蔣雅文（Mandy）於八年前單人匹馬到台灣尋覓其理想邦，開設自家品牌服飾店，去年更做了台灣新娘，下嫁「翻版曾俊華」設計師朱經雄，兩夫婦在台北一幢老舊的建築物開設服裝精品小店Ferment Store，離港多年的Mandy終於短暫回流，現於中環的PMQ開設期間限定店，為期12日。

Mandy的店只售自家設計T恤和環保袋，在港久未露面的她吸引大批年輕人光顧。

Mandy和老公形影不離工作都拍住上，兩人親手為每件T恤印畫。

回饋返港開店

昨日是第二天開店，Mandy和老公在店內親自打點，她說：「台北舖頭係一間老屋，好多結構上裝修要處理，我哋唔夠資金，所以喺網上募集150萬新台幣，當時有回饋計劃，問客人有乜特別想要，客人好希望我哋返香港開舖頭，呢七、八年聽過好多次，但返港開唔係簡單事，要好多資金、資源、人手，不如開期間限定店，同大家見嚇面。」Mandy又謂希望用誠意回報支持她的香港朋友，店內每件衫的圖案都是親自印上。

談到心願是否返香港開店？Mandy說：「結婚之後諗法唔同，當你有一個家庭，以前唔敢諗唔敢做，𠵱家都唔排除可能性，我唔知幾時先會返港開店，但唔會否定呢件事。」老公會跟她回流香港？她說：「佢係一個唔太著重錢嘅人，只係想達成自小理念，自己嘅設計可以出現世界各地。」是否仍然心繫香港？Mandy坦言：「香港對我嚟講係情意結，每次返嚟都希望陪我長大嘅環境，可以繼續生存落去。我覺得𠵱家香港人生活唔開心，做人其實好簡單，當你覺得一啲生活基本需求好似係苛求，自然會覺得失望。」

蔣雅文希望透過今次在港開店，為大家帶來勇氣。


當年的英皇3T各散東西，Yumiko（右）和Maggie（左）已為人母，Mandy因身體問題暫未能生B。

盼活在印象中

Mandy上次返港正值雨傘革命，她都有去金鐘撐學生，她說：「係，未必可以真係做到啲乜，但會覺得有種使命感。」如果再揀，想在台灣還是香港生活？她說：「我想喺印象中嘅香港生活，我好愛香港嘅本質，希望回覆番以前小朋友時嘅生活，所有嘢好單純好可愛，街坊炒餸多咗，自自然然攞去畀隔籬屋加餸，呢種人情味真係香港人先有，希望大家努力收復失地。」

此外，早前發現患了多囊卵巢綜合症，問到現在的身體狀況，Mandy坦言：「比以前虛弱好多，冇惡化，但得番以前七成功力。醫生建議我養生，如果𠵱家有小朋友，身體負擔會好重，未必有充足營養，最後可能我又搞到半條命，BB又唔夠健康，希望兩年內可以搞好身體。」

採訪：皓騫
攝影：沈健程
from:http://hk.apple.nextmedia ... 150729/19235345

Mandy婚後跟老公在台北開店，由於位於一幢老宅內，要募集150萬新台幣裝修。

好多港人都想出走台灣，蔣雅文在當地生活了八年，在她眼中的台灣有好有不好。

【台灣十樣好】

（1）台灣人好nice

當初自己去台灣，人生路不熟，台灣人好友善幫我度過好多無助時候，如果我係去咗人同人距離遠嘅地方，可能好多時候自己等死。

（2）為自己驕傲

台灣人有一句話：台灣雖然很美，但最靚的風景是人。

（3）價廉又物美

如果你嗰排窮啲冇錢，可以好平食一碗麵，港紙幾蚊就可以食到。

（4）生活有尊嚴

台灣唔會用一把尺去量度乜叫成功，乜叫失敗，只在乎背後嘅意思，所以台灣窮有窮生活，但生活得有尊嚴。

（5）生活空間大

台灣面積大，每人分到嘅空間、空氣都多啲，我希望有個健康、有氧份嘅地方，節奏慢啲咁去生活。

（6）衣着多元化

就算今日着到七彩，只要自己開心就得，所以台灣人穿着風格多姿多采。

（7）有好多風景

喺台灣就算唔出國旅遊，都可以兼顧心靈上嘅需要，唔使一定要張機票逃離煩囂城市，有張火車票就夠。

（8）男仔較溫柔

香港男仔我會同佢硬鬥硬，最後兩敗俱傷，台灣男仔比較溫柔，識得用婉轉方法對付你，所以我畀佢馴服咗。

（9）一家人生活

今年初接咗父母去台灣生活，喺香港我未必有資金完成呢個夢想，台灣生活費唔需要太多，但心靈上好充實。

（10）同港距離近

因為長女，怕屋企有事時嚟唔切趕返嚟，台灣距離係我優先考慮，亦畀到父母安全感嘅地方。

【台灣十樣不好】

（1）容易一窩風

台灣容易對新事物感興趣，對舊事物比較淡忘，所以喺台灣做生意比較辛苦。

（2）消費無得比

呢樣冇得去強求，當然希望畀屋企人更好生活，但喺台灣賺取嘅勞力回報，未必同香港有得比。

（3）男仔易滿足

台灣男仔比較單純，佢哋好易會滿足，唔會好似香港男仔咁衝，所以我同老公有陰陽協調感覺，我衝得太勁，佢會拉我一把，佢太hea，我會扯住佢走。

（4）味道差唔多

台灣好多好嘢食，但台灣人對台灣味非常鍾愛，都係甜甜哋嘅醬，唔似香港有咁多異國菜。

（5）做媳婦諗諗

如果要做台灣媳婦，嗰邊會比香港傳統，要好好考慮呢點，呢代媳婦要妥協一吓。

（6）草莓扮光鮮

年輕人係草莓族，外表睇落好光鮮，但一壓就扁，抗壓性唔夠，好多都捱唔到苦，約佢見工突然no show。

（7）垃圾桶太少

喺台灣要你嘅袋夠大，去keep住你嗰日嘅垃圾，可能搵幾條街至有垃圾桶，呢樣真係唔方便。

（8）好多電單車

台灣好多電單車，每架都有死氣喉，空氣質素真係非常差，自己要戴口罩，唔好吸咁多廢氣。

（9）燒味唔好食

台灣好多燒味舖，掛念故鄉入去食，但放入口真係失望，將我打入地獄感覺。

（10）女仔較虛榮

台灣女仔比較嚮往貴婦生活，好多高級下午茶，着重上身銜頭名牌。好多台灣女仔好靚，但武裝出嚟就將自己冚住咗，覺得好可惜。
from:http://hk.apple.nextmedia ... 150729/19235350