薛凱琪以她的歌曲名，rap住報告天氣。
形象設計師馬天祐的新創作計劃「15FAME」，早前請來近日新婚的Angelababy出鏡，其實整個計劃總共邀請52位藝人以不同形象出現，當中除硬照和影片外，每人亦會唱一首歌，日前就輪到扮演天氣女郎的薛凱琪（Fiona）上陣。
用自己歌名串連
Fiona當日以不同天氣的形象拍攝，以Rap表達出一段以天氣內容為主的歌曲，化身天氣主播。Fiona接受訪問時說：「今次同馬天祐合作，佢以天氣為主題，仲要我聲演主播報天氣。其實好好玩，不過又好難，因為歌詞要讀得好快，入面又好多資訊。其實佢哋好有創意，入面用咗好多我嘅歌名去報一連串嘅天氣。」她又笑說自己中文水平麻麻，所以歌詞要提早用拼音標示。
藍色雪花卡紙做成的斗篷。
造型上，以不同色彩的卡紙表達四季天氣，當中以藍色雪花卡紙做成的斗篷表達冬天。
馬天祐在旁指導薛凱琪擺甫士。
問到自己對四季形象的看法時，她說：「佢哋希望我用表情同身體語言去表達，第一次用紙嚟做配件影相感覺幾得意，希望日後有機會可以再同馬天祐合作。」至於創作主腦馬天祐就說：「其實自己都未做過一個咁嘅Project，所以覺得好好玩，初初說服藝人嚟一齊玩都唔容易，不過佢哋瞭解咗之後，好似Baby咁仲提出好多好玩嘅意見。」他又提到Fiona的天氣女郎主題說：「佢演技好好，可以好輕鬆演繹唔同角色，今次就希望佢用演技表達唔同天氣嘅感覺。」
採訪：藍文浩
攝影：陳順禎
from:
http://hk.apple.nextmedia ... 150622/19193011
