盛女Whitney陪繼子女玩跳樓機

今年23歲嘅盛女Whitney，前年同「模媽」Mia（陳靜儀）前夫莊家傑閃婚，上年6月生咗個8磅肥B Chalmers，兩個月前宣佈再度有喜，兩年抱兩，夠曬好生養！

日前本報發現陀住4個幾月肚嘅Whitney，帶埋未夠1歲嘅囝囝、奶奶、老公，仲有老公同前妻Mia生嘅一對仔女，去紅磡廣場一間酒樓飲下午茶，之後再到附近冒險樂園喪玩，三代同堂玩足一個下晝，超級開心。

當日下晝兩點幾，仍未見肚嘅Whitney喺酒樓坐低就攞住點心紙狂揀嘢食，之後見佢好好胃口食唔停，仲唔多理儀態，大啖大啖將食物塞入口。不過，因為瞓喺BB車嘅囝囝突然醒咗，Whitney就開始好忙，邊食邊推動身旁的BB車𠱁囝囝，又要應付老公一對仔女。

【六口家】

Whitney婚後已育有一子，今年再生一個，加埋老公同前妻生嘅一仔一女，即時變一家6口。

【玩自拍】

繼女好黐Whitney，飲茶期間兩母女仲玩自拍。

【買汽水】

囡囡玩到口渴，Whitney老公莊家傑就買汽水俾佢飲。

𠱁掂夫家三代

雖然老公一對仔女唔係自己親生，但見Whitney同兩個小朋友相處得好融洽，尤其囡囡明顯好鍾意黐實呢位「哎吔媽咪」，經常圍住佢跑跑跳跳，有時又會突然攬住佢，Whitney同奶奶關係亦唔錯，全程雞啄唔斷。

一行6人，當日極速食飽就埋單走人，事關要轉場去冒險樂園玩，離開酒樓時小朋友仲開心到紮紮跳，但都好聽Whitney話，跑到幾遠都一叫即停。而Whitney雖然已為人妻兼人母，但仍童心未泯，去到遊樂場好似忘記咗自己「大肚」，竟然同小朋友玩埋一份，最「牙煙」係玩一部類似大型遊樂場嘅跳樓機，Whitney啱啱坐上去都好似唔知驚，但機動遊戲上下chok咗幾下之後，就見佢表現僵硬，玩完仲好似面青青㖭！有大有細，下次咪搞喇！

採訪、攝影：畢紹基
from:http://hk.apple.nextmedia.com/entertainment/art/20150424/19123314

Whitney昨日暫忘擔憂，穿上三點式泳衣，挺6個月肚陪囝囝到泳池玩水。互聯網圖片
盛女Whitney前年8月宣佈閃嫁模媽Mia前夫莊家傑，大仔蜜蜜日前剛滿1歲，第二胎預產期在9月，兩年抱兩，本來很開心。不過，上月1日Whitney突然在網上貼文宣佈離婚，加上自爆受胎盤前置影響情緒，每天起床前都會發噩夢，夢見全床都是血，令本來幸福滿瀉的小家庭，突然發生巨變一樣。

不過，早前Whitney被本報影到與莊家傑齊齊見婚姻輔導員，明顯希望透過專業人士協助維繫婚姻。昨日致電Whitney問她與老公莊家傑關係如何？她直認有改善：「已經去咗兩次婚姻輔導，全部係要去4至8次，覺得有幫忙，老公更加識得包容同體諒，更加識得關懷人，以前就唔係好識講嘢。」

Whitney同老公莊家傑為挽救婚姻，齊齊約見婚姻輔導員。資料圖片

Whitney留言講述自己胎盤前置，影響情緒的苦況。

「只係想順產」

Whitney又承認，今次陀B感覺跟之前大不同，加上懷孕期間荷爾蒙改變影響心情，導致她出現離婚念頭。至於，頻頻發噩夢的問題，她說：「已經睇咗醫生，都係叫我心情放鬆囉！問我有冇宗教信仰，我話我信基督教，佢就叫我祈禱。」

相當緊張囝囡的Whitney，表示今次陀B令她最擔心並非出血及怕開刀會留疤及痛：「只係想順產，囡囡可以有第一道抗體，咁對佢會好啲，我希望畀到最好嘅嘢個女，我好緊張啲小朋友。」但Whitney指目前她只可以等，兩個月後胎盤沒有升高就要開刀。

然而，Whitney昨午亦暫把煩憂放一邊，將陪囝囝到泳池玩水的相放上網，穿了救生衣的蜜蜜帶了膠鴨仔放在水中玩耍，陀着6個月B女的Whitney，上圍則明顯升級，穿上三點式泳衣極之吸睛。

採訪：小米

蜜蜜仔有媽咪陪玩水超開心，仲帶埋鴨仔去泳池玩。互聯網圖片

Whitney日前將加了眼淚的相放上網，自爆日日發夢流血。互聯網圖片
From:http://hk.apple.nextmedia ... 150601/19167615