Whitney高調送禮俾Mia陳靜儀仔女，又挑機？

盛女Whitney早前就閃嫁媽模陳靜儀（Mia）嘅前夫莊家傑，兩女隔空互片，Mia係咁喪寸前夫莊家傑，又話「姣婆遇著脂粉客」，結果演變成莊家傑還拖，親撰公開信大爆Mia沒照顧子女、整容隆胸、偷食、講大話同唱衰Whitney呢五宗罪。羅生門事件沒完沒了，最後驚動埋莊老太——即係Mia前奶奶親寫信件力撐Mia，但係呢……原來莊老太係唔識字0架喎!

Mia同翻版Mia——即係Whitney，唔止樣似，仲鍾意埋同一個男人。依家，仲鍾意埋同一對小朋友———其實係Mia同莊家傑所生嘅仔女嚟嘅，依家同莊家傑及Whitney同住，Mia成日都話想湊番對小朋友走。早前Mia貼咗一張抱起疑似Mia囡囡嘅挑機相，囡囡仲好似好黐Whitney咁，搞到兩個「Mia」幾乎又要隔空互片。不過Whitney事後就澄清番嗰個唔係Mia嘅小朋友，息事寧人。

靜咗一排，翻版Mia——sorry，即係Whitney，又開始挑機喇。佢昨日喺網上貼咗一張禮物相，仲打咗段文話：「既然嫁了給你，你的家人就是我的家人，小兒子就快生日了，先買定小禮物跟你慶祝，弟弟生日，姐姐都要禮物，姐姐生日，弟弟都要禮物，所以呢，以後任何一方生日我們都是要買兩份，不然他們會嘈be li ba la........HaHa，好可愛，我妹妹都有一份，想到日後我有孩子的話，就一年要抬16箱玩具咯，haha......溫馨的家不是放錢的地方，是一個放『心』的地方，我會盡力給你們愛和關懷的。」當中講到「家不是放錢的地方，是一個放『心』的地方」，咦，唔知係咪回應緊Mia被指擺低錢俾家人、用嚟照顧一對小朋友呢單嘢呢？
from:http://hk.apple.nextmedia ... 131126/18524512

【日日驗孕】媽模陳靜儀（Mia）嘅前夫莊家傑今年8月同Whitney閃婚，小倆口新婚即爆出Mia數臭前夫贈興，莊家傑不忿還拖，最終Mia獲前奶奶撰文力撐贏尾彩，罵戰得以畫上句號。有指事件後，Whitney同老公搬開住另築愛巢，Mia同前夫所生一對仔女交由嫲嫲照顧。

Whitney婚後升呢做後母，但都愛錫老公同前妻所生嘅仔女，Whitney都想同老公生BB，婚後已不設防，近日兩公婆仲去咗日本旅行，出發前Whitney已預告全力造人，Whitney噚日喺facebook留言：「好期待，何時可以知道有沒有好消息，好想每天都陪着他，已經想好弄甚麼款式的早餐，改甚麼名字，已經在想會不會到時攬住醫院條柱扭計話唔生。我每天都在驗，好像那些整天想中彩票的瘋婦一樣……」言語間似暗示有喜，守庫噚日即短訊Whitney送恭喜，佢話：「一有好消息，我一定分享的。」Whitney仲話想生孖胎。

Whitney日前同老公到日本旅行，乘機努力造人。互聯網圖片

Whitney喺fb貼上凸肚公仔相，透露恨生B。

媽模Mia母兼父職照顧一對子女。

聽到Whitney疑有喜，仲話驗孕似買彩票等中獎，Mia噚日搞笑咁話：「想中獎，咁叫佢買多幾張六合彩，又或者拜吓有求必應嘅黃大仙。」可擔心將來Whitney會偏心自己BB，冷落Mia一對仔女？Mia話：「唔會，我哋係兩個唔同家庭。」

場主：守庫
from:http://hk.apple.nextmedia ... 131128/18527013