無線主辦的勁歌金曲頒獎禮前晚由自己友星夢及友好英皇玩曬，全晚頒發三十八個獎項，兩間公司共擸走二十五個獎，無線「親生女」吳若希竟撼贏謝安琪（Kay）奪金曲金獎，最諷刺是Kay還要跟奀星林師傑同獲兩獎「平起平坐」，難怪收視插水最低僅十二點創歷史新低，Kay經理人夏森美接受本報訪問暗寸：「如果以後純粹睇邊間唱片公司出得人多就有回報，相信我哋永遠滿足唔到無線要求。」
無線自二○○九年跟四大唱片環球、華納、SONY和EMI因版稅問題反面後，四大歌手絕跡無線音樂節目，加上年前無線成立星夢娛樂力捧「親生仔」歌手，搞到一直力撐無線的英皇都有微言，雖然無線宣佈開放勁歌總選跪求沒合約歌手撐場，可惜最終事與願違，太陽娛樂和星娛樂都加入拒玩行動，結果前晚在電視城舉行的勁歌金曲頒獎禮，陳奕迅、李克勤、許志安、周柏豪、官恩娜、薛凱琪、關心妍等歌手統統缺席，僅得容祖兒、張敬軒、謝安琪充撐場面，難怪收視跌破歷史新低，最低僅得十二點（約七十八萬觀眾），平均只得十四點（約九十一萬觀眾），相比去年廿一點，收視大幅勁跌七點。
在蜀中無大將下，全晚三十八個獎項，無線自己友星夢狂擸十二獎，友好英皇橫掃十三獎稱霸，英皇旗下軒仔和祖兒分奪最受歡迎男女歌星，至於金曲金獎賽前是謝安琪《獨家村》和吳若希《越難越愛》之爭，雖然Kay被網友睇高一線，最後卻落敗，Kay在台下扮喊交戲，網友留言轟《越》獲金曲金獎不公平：「頒獎係咁多個入面最垃圾嗰個」、「呢首歌旋律普普通通，唱嗰個把聲都唔係話好特別。」
經理人夏森美（左）為Kay在勁歌只獲兩獎抱不平。資料圖片
謝安琪最近雖然幫無線拍新劇《殭》，但始終不是親生女被冷待。
非親生女慘遭冷待
雖然Kay正為無線拍新劇《殭》，惟始終不是「親生女」被冷待，全晚僅得兩獎與奀星林師傑「平起平坐」，輸給獲三獎的後輩吳若希、許廷鏗、鄭俊弘。對於Kay失落金曲金獎，經理人夏森美昨在電話暗寸無線：「我哋對無線一直支持，優秀選、總選記者會Kay都出席，佢哋打過電話嚟叫我哋幫手，我哋都抽時間支持，心就交咗出嚟，然後佢哋安排係點樣，大家都清楚明白，我哋唔係單單要求幫無線做咗嘢一定有回報，但以Kay今年專輯同音樂上叫好叫座口碑，最後咁樣結果，我係絕對有保留。如果以後純粹睇邊間公司出得人多就有回報，相信我哋永遠滿足唔到佢要求，我哋只有專心做好音樂，令到樂迷滿意。」問會否影響跟無線合作？他說：「無線有好多部門，我哋同好多部門合作開心。」
出道四年的吳若希竟贏三獎包括金曲金獎，令人質疑親生女有著數。
祖兒出席撐場結果掃四獎成大贏家，無線還增設最受歡迎歌手十年大獎嘉許。
林師傑在樂壇寂寂無聞hit歌都唔多隻，竟然獲兩獎跟謝安琪睇齊。
吳若希自嘲未夠班
至於Kay在慶功宴上說：「我都好榮幸年年都乜乜之爭，我係之爭王，我覺得賽果令大家好舒服，每個獎項都實至名歸。我覺得佢呢首歌（《越難越愛》）覆蓋好全面，我自己條村我都好滿意，但佢去到越南喎。」問到年僅廿二歲、出道四年的吳若希是否太快攞大獎？吳若希說：「係，我覺得好多嘢我係未夠資格，我嘅唱功，我個樣，甚至做人唔係最好嗰個，我希望用努力去將呢啲唔夠好嘅做好佢。」
至於獲新加設最受歡迎歌手十年大獎的祖兒說：「我公司破紀錄，攞咗兩個女歌手獎，今年攞十年老人牌，好感動。」對於之前傳英皇不滿無線偏幫星夢，故前晚英皇擸十三個獎安撫，祖兒說：「獎項交番畀公司幫我安排，每人對我嘅好都銘記於心。」
採訪：皓騫
英皇狂掃十三獎成勁歌班霸，可惜頒獎禮星光黯淡收視最低十二點創歷史紀錄。
from:
http://hk.apple.nextmedia ... 150120/19008443
