現年39歲嘅謝安琪（Kay）同老公張繼聰育有9歲囝囝張瞻，Kay之前話要暫別樂壇，趕40歲追多個B，經過3個月停工努力造人後，前日Kay同老公現身沙田。本報讀者曾先生透過「爆相爆片」報料，Kay著鬆身裙用手護肚，孕味甚濃。曾先生話：「喺沙田政府合署見到張繼聰企喺樓下等，冇耐謝安琪一個人揸車嚟，之後就落車調位，見到謝安琪個樣好病，著闊身長裙，仲用手㩒住個肚，好似有咗小朋友咁。」
張繼聰一直扶住老婆，但佢堅稱老婆冇事。
「謝謝大家祝福」
Kay回應孕味濃時答得好隱晦：「謝謝大家的祝福，如果有好消息會再公佈。」至於阿聰就話：「冇嘢呀，扶太太上車，好正常反應啫。」問到Kay點解用手㩒肚？阿聰話：「冇乜特別意思，我都冇為意喎！」提到Kay孕味濃，阿聰話：「唔係，有會同大家講，我同佢去運輸署搞牌照，佢喺度等我啫。」
係咪驚未夠三個月BB小器？阿聰話：「唔係，多謝關心，我哋會努力。」佢仲話老婆冇事，好happy。其實上星期，兩公婆被影到喺九龍塘一間嬰兒用品店睇BB床，加上Kay行路用手護肚，種種跡象都好似喎。
撰文：馮仁昭
from:
http://hk.apple.nextmedia ... 160721/19703004
