陳茵媺（Aimee）舊年年尾先為陳豪生咗囝囝Aiden，不過早前佢哋已經又再宣佈造人成功，陀住四個幾月BB嘅Aimee前晚喺金鐘出席活動時自爆今胎又係囝囝。同一晚陳豪到銅鑼灣出席電影《點對點》首映，接受大家祝賀之餘，佢老實唔客氣話想再追個女：「呢個年代越多小朋友越好，係上天嘅恩賜，生成隊足球隊仲好，總之上天賜幾多個就要幾多個，呢份喜悅係全世界最開心嘅。」
陳豪（左）前晚出席電影首映禮講到再做老竇，全程笑到合唔埋嘴。
兩公婆有分歧
不過有傳Aimee好似想復出拍戲，但陳豪話呢個係佢哋嘅planning：「大家都好鍾意小朋友，𠵱家多個細佬，哥哥做運動有個伴，不過如果再生，間屋就要再大啲喇！」不過佢直認老婆仍有演員團火，只係𠵱家做屋企嘢先，而肚入面嘅B仔就仲未改名。另外，問到外籍鄰居投訴陳豪訪客佔用車位，佢就笑笑口話：「小事一樁，冇特別同對方溝通，尤其係見佢做咁激烈嘅行為，等佢冷靜嚇先！」茵媺在活動上被問到係咪會追個女，佢即刻話要慢慢先：「兩個小朋友難handle，而且我好熱愛工作，睇嚇搞唔搞得掂工作先啦！我都好想出嚟見大家。」
撰文：馮仁昭
from:
http://hk.apple.nextmedia ... 141030/18916931
