性感女神葉玉卿與老公胡兆明婚後育有一女二子，15歲大女芷欣已情竇初開，結識了日韓混血同學兼男朋友仔，即令卿卿與老公大為緊張，夫婿更甚為妒忌，卿卿則學會接受此乃女兒成長的必經階段，跟芷欣約法三章訂下拍拖「三不准」！對於女兒的初戀男友，卿卿已見過面並大讚好cute、好乖、好sweet！
葉玉卿的15歲索爆女兒胡芷欣剛墮入愛河，令媽咪大為緊張。
葉玉卿有女初長成，15歲的大女胡芷欣長得亭亭玉立，遺傳了母親的美人胚子及驕人身材，靚女自然多人追，原來芷欣已悄悄與日韓混血的同學仔展開兩小無猜的甜蜜初戀，令卿卿大為著緊！
將媽咪拒諸門外
卿卿透露女兒一向很黐她，去年突然變得陌生，甚麼也不跟她說：「個女成日掛住用電話發訊息，可能佢有男仔追，亦對男仔產生好奇，好似將我拒諸門外，踏唔入佢嘅世界。」幸好女兒的青春反叛期維持約半年，卿卿由開始時不開心到及後已看開，更為女兒變得獨立感到開心：「之後我同佢講，如果有男友就帶返屋企，好過喺出面唔知佢哋做咩。」
胡芷欣15歲開生日party，約齊同學及男朋友仔（右）出席，卿卿老公胡兆明（中）在場打點。
葉玉卿（左）與女兒兩年前的泳裝照，當時13歲的芷欣已很索。
一家早前同赴希臘參加友人的婚禮。
見過芷欣的初戀男友後卿卿留有不錯印象：「佢媽咪係韓國人，爸爸係日本人，都係醫生。一開始見面我都好緊張，佢好cute，因為學校都好好，好乖好sweet，大家都係同學仔puppy love。」當卿卿問到芷欣對男友的印象時，芷欣形容對方為「best friend」，亦令卿卿大為安心：「因為大家都細，唔係話要談婚論嫁，係男女朋友仔。」
雖然卿卿樂於接受女兒拍拖的事實，但老公胡兆明卻大為妒忌感到唔開心：「老公當然唔希望佢有男友，因為會同佢變得冇咁親，覺得個女咁細個就拍拖唔係咁好。但依家唔到父母話唔准，管得愈緊就會愈反叛，反而會好似推走個女個咁，寧願大家好似做朋友咁仲好。」卿卿與女兒約法三章，為芷欣拍拖定下規矩：「寧願佢哋喺屋企見面，依家一星期見一次都幾好，但唔可以鎖房門，有啲嘢唔可以做，唔可以太親密！」
像見到陌生人
芷欣情竇初開，卿卿感觸的說有時像是見到陌生人：「同細細個時好唔同，冇話靚唔靚，父母永遠都會覺得好睇，有人話仔女係父母前世情人，所以永遠都好睇。」芷欣雖然盡得卿卿完美遺傳，只是女兒對演藝界未感興趣：「佢可能有興趣做model，但又要讀書就兼顧唔嚟。」
子女日漸成長，卿卿笑言與老公的二人世界時間愈來愈多：「二仔13歲已經好似我咁高，仲變緊聲，有時打電話返屋企都認唔出佢把聲，好得人驚。細仔依家11歲仲會黐我，我好珍惜，因為仔女一大，呢段時間好快就過咗！父母千萬不要投訴仔女太黐身，有得黐就要黐，同個女一齊瞓咗差唔多14年，以前會覺得好黐身、冇自由，依家諗番就覺得好感恩！」
文：專案組
from:
http://orientaldaily.on.c ... /00282_001.html
