嫁咗過美國十六年的葉玉卿，今年難得新年前回港做電影宣傳，自言成世都未行過花市的她，一於要去維園年宵感受氣氛，「嘩！原來好熱鬧囉！係shoulder to shoulder嗰種，一路食一路行吓買吓，真係好正！」Christina's Cake Shop老闆娘陳妙蘭，雖然每逢農曆年都離港避歲，但都會買年花裝飾屋企，「話晒新年，屋企點都要有氣氛嘅！」
未行過花市
新年行花市是指定節目，但在香港長大的葉玉卿原來從未行過，更遑論十三歲女兒胡芷欣，「佢（囡囡）都興奮，問我係乜嘢嚟，我話：『Flea market,Chinese New Year flea market.』佢就話：『Oh!I wanna go!』」於是她趁留港宣傳賀歲電影期間，偷了一粒鐘時間，帶埋女兒齊齊去維園踩場。
她們對各種貨品都感興趣，檔主見到卿卿母女都落力推銷，卿卿亦來者不拒買買買，不消半小時，已花掉近八百元，二人全力掃中國傳統小食，一見冰糖草莓即買來吃，「莫講話喺美國冇得食，就算而家都唔係成日見得到，龍鬚糖、麥芽餅，勾起好多童年回憶，所以我特別想介紹俾個女。」原來芷欣在美國都成日食缽仔糕，「我個女好鍾意食，我家姐喺加拿大過嚟時會特登買俾佢，所以頭先見到，個女就搶住買，哈哈。」
滿手戰利品的卿卿話有機會一定再行花市，女兒就覺得：「Cool!Fun!」卿卿與女兒吃了很多傳統小食，包括冰糖草莓，問芷欣最喜歡哪一款中國傳統食品？「Strawberry!」
卿卿向芷欣介紹麥芽餅乾、龍鬚糖、豆沙餅等中國傳統食品，一班中學生檔主留起自用的最後一盒缽仔糕，亦割愛賣給卿卿。
自製氣氛
說到最難忘的新年，卿卿說一定是今年，「每一年嘅新年，我都會打電話同媽媽拜年，今年就冇得同佢拜年。但係又唔係太傷感嘅事，因為佢咁大年紀去都係一個笑喪，我更加應該提醒自己珍惜同埋感恩。我已經知道年初一瞓醒我會做咩，一瞓醒，『呀！幾多點呀？夠鐘未呀？打俾阿媽先。』跟住諗吓，『呀！佢唔喺度喎。』因為而家每隔日就會發生呢樣嘢。」
母女二人邊行邊食，食到口渴便飲蔗汁。
有檔主送了「靚足一世」揮春給卿卿。胡芷欣雖然不明公仔揮春意思，但十分好奇，最後買了三張布揮春。
花市內經過蕭若元（右）及慢必（中）的攤位，蕭若元立即送上新作《成王敗寇》及《邊緣回望》給卿卿。
行花市時，卿卿偶遇前男友兼髮型師Boffy，十八年未見過面，卿卿介紹女兒給他認識。
陳妙蘭新年插竹葉
維他奶創辦人之一陳南昌的孫女、Christina's Cake Shop老闆娘陳妙蘭（Christina），每年都會趁農曆年假期一家人去外地滑雪，今年他們就會到加拿大威士拿滑雪。「因為好多親戚喺外國住，聖誕節佢哋會返香港get together，反而新年就各自去旅行。」今年Christina年廿八便出發，玩足九日才回來，「返到嚟，一日內要去晒所有親戚度拜年，諗起都驚。」
雖然不在港過年，但她一樣會去花墟買花迎新歲，「桃花同桔就由老公去沙田嘅花場訂，花墟嘅唔夠靚。」今年她在花墟更有特別任務，「搵咗風水師睇風水，有好多嘢要擺，for我兩個仔都有唔同嘢。」她一到花墟即四圍搵觀音竹，「呢啲都易搵，另一個仔要擺熊貓食嗰種竹葉，都唔知邊度有。」就連花鋪老闆都俾佢考起，陳妙蘭笑言：「唔通要搵盛智文（海洋公園主席）幫手？哈哈！」
除了真年花，身為餅店老闆娘的她，亦做了食得落肚的桔仔小盆栽送朋友，「我仲同餅店設計咗十二生肖曲奇，小朋友好鍾意。」
Christina花$2688買了盆日本蕙蘭，「其實新年我好少擺蘭花，但呢隻淺粉紅色真係好靚。」她又買了一盆九代同堂（圓圖）。
搵足成條街，先見到啱心水的銀柳，即買！她又幫襯買新界出產的新鮮草莓，「要支持本地出品！」
她為囝囝買了八枝觀音竹，「仲要買熊貓食嘅竹，去邊搵？」
Christina的糖桔仔是非賣品，十二生肖曲奇（上圖）就在她的餅店有售。
