唔理老公反對，堅持返香港幫《2013我愛HK恭囍發財》做宣傳嘅葉玉卿，好頭好尾唔係齋講，人一到，電台電視台日日有嘢做。
上個禮拜一（四日）做完首映再踩埋去食火鍋慶功，第二日又撲入將軍澳電視城做賀年節目《新春自家菜》錄影，老媽子做餐懵，囡囡Victoria（胡芷欣）亦要捱埋一份，跟出跟入，拖喼拎嘢看手袋，幫頭幫尾。
錄節目閒閒哋要幾粒鐘，阿媽埋位，十三歲Victoria踎响錄影廠悶到慌，唯一可以做，就係瘋狂打機！
咪俾我估中，卿卿想再返香港過戲癮，下次應該冇咁容易，佢老公唔嘈晒先怪！
卿卿入電視城錄影，十三歲囡囡做阿四拎嘢看嘢，踎响錄影廠打住機等媽咪收工，俾着我係胡先生，嘈硬！睇完首映，Victoria捱眼瞓都跟埋媽咪去慶功宴。
