經典笑匠周星馳，幕前為觀眾爆笑彈，但幕後卻被數臭，繼向太陳嵐、林小明等怒插星爺後，梁思浩對這位80年代同期出道，一同在公仔箱成長的好兄弟都不留情面，思浩前晚錄影節目時呻笨，當年賤價兩萬平讓古董車給星爺，看在老友一場，可是當星爺走紅後，兩人友情變質，星爺片場黑臉叫思浩非常難受，兩人積怨20年，思浩昨日出席活動時更詛咒星爺落十八層地獄。
網上近日流傳一篇文章《為甚麼這麼多人黑周星馳？》導致經常令觀眾發笑的周星馳成為圍插箭靶，尤其向華強太太陳嵐鬧爆星爺，不少曾跟他合作過的人如林小明、邵音音等都聲討，一向敢言的梁思浩也加入戰團，思浩表示力撐向太，他一連兩日連環發炮數臭星爺。前晚先爆星爺賤買思浩古董車，昨日思浩在尖沙嘴出席有線節目《怪談．落你降頭》時，更揶揄星爺要落十八層地獄。
星爺連日遭人圍插，思浩直指他人格有問題。
資料圖片
思浩曾指在《國產凌凌漆》片場叫「星仔」而遭星爺黑臉，一場喊戲要拍17次被玩謝。
劇照
「佢最緊要有錢」
思浩和星爺識於微時，80年代合作無線綜藝節目《歡樂今宵》，兩人同撈同㷛，兄弟一場，思浩前晚錄影now節目《娛樂審死官》時，還跟李麗蕊唱雙簧寸星爺。思浩回想88年跟星爺、林穎嫺受力捧開劇，當時思浩和星爺扮兩兄弟而稔熟，星爺看中思浩駕駛返工的古董車，思浩說：「當時呢架係我第二架車，我都好鍾意，佢（周星馳）問我幾時賣，佢話好鍾意，佢話我哋咁好朋友，你賣畀我啦，我話平五萬唔得，佢話自己冇錢唔掂，我話平兩萬啦，我買架車返嚟都12萬幾，佢話下次賣番畀我，於是我當擺喺度畀佢用，結果兩萬賣咗架車畀佢，佢當時答應遲啲兩萬賣番畀我，佢就揸走咗，之後我哋分開發展，又冇乜聯絡。」
其後星爺星運越撈越好，兩兄弟94年在電影《國產凌凌漆》片場再見，思浩興奮大叫「星仔」：「佢黑我面黑咗成日，我就知道原來佢就唔係以前嘅佢，呢件事令我幾傷心，我從來冇同人講過呢件事（指賣車），我傷心在佢hurt咗我個心。」對於圈中人鬧爆星爺，思浩說：「佢唔介意喎，佢最緊要係有錢，佢唔介意有冇朋友，叫我評價佢，佢絕對係一個有才華而冇品格嘅人。」
思浩昨日出席有線活動，更請來師傅以蜘蛛、蛇、蠍子等五毒物為王寶寶（春捲）即場示範解降頭。春捲大爆節目中曾受鬼降兼遊地獄，甚至撞鬼。
思浩和李麗蕊（左二）曾跟星爺合作《歡樂今宵》，李麗蕊大爆拍檔唱歌五音不全，累街坊要重錄。
梁思浩（右二）昨日出席春捲的解降儀式。
「大家層數唔同」
思浩竟抵死叫春捲把地獄情況轉述星爺，他說：「希望佢知地獄係點，等佢改過，知道將自己性格改番好啲，對人好啲。呢個世界，睇嚇落邊層，佢可能十八，我可能四，大家唔同，我冇話我上天堂，我都係落地獄嗰批，大家層數唔同。」思浩指現在肯撐星爺的只有兩種人，他說：「第一種搵緊佢錢或打緊佢工，第二種係同佢臭味相投。」
採訪、攝影：盧妹
From:
http://hk.apple.nextmedia ... 140913/18864429
