自從下嫁馬廷強全面退出幕前，黎姿除忙於打理馬家大小事務、專心照顧三個寶貝女，還要抽時間睇住皮膚診所生意，堅持樣樣事都要管，每日定必分配時間返工。
最近黎姿加碼投資二千萬，在中環甲級商業中心開設二千多呎分店，並親自做白老鼠，試用所有新儀器。上星期六（五月十七日）黎姿趁三個女上興趣班空檔，到中環新鋪巡視業務。就快四十三歲的黎姿，現場所見面上零皺紋，生完三個女依然保持住V煞面，羨煞旁人。
親自巡鋪上星期六（十七日）下午二時，黎姿（Gigi）安排好三個囡囡上興趣班，趁有幾小時自由時間，乘坐七人車離開梅道寓所，前往中環雪廠街一幢商業大廈，巡視在上月中才裝修好的首間CosMax診所分店。
雖然新鋪開張，仍在試業階段，但Gigi相當緊張生意額，見她在接待處向職員查詢當日booking，發現所有時段全部有客預約，Gigi表現得極之開心，還以老闆娘身份鼓勵員工：「幫我同啲同事講辛苦曬大家，我知道你哋好攰㗎！」
之後Gigi到新鋪另一邊巡視，行到去裝有燈光背板的大藥櫃，Gigi顯得有點緊張，擔心燈泡熱力過高有機會影響藥物品質，於是問當值護士瞭解情況，並伸手入櫃，親身感受背板的溫度，雖然熱力不算高，但Gigi依然唔放心，叮囑護士，記得搵醫生深入研究溫度問題。
Gigi每日都會返公司巡視業務，向唔同員工瞭解工作情況。
中環新店有二千多呎，裝修充滿cyber feel，而門口的醫生名牌仍然有黎嬰的名字。
睇到預約booking爆滿，Gigi開心到忍唔住笑。
在診所逗留了個半鐘，Gigi就離開趕住去湊女。
藥櫃背後有燈，Gigi怕會過熱，用手親身測試溫度。
因為黎嬰發生意外，Gigi為了幫細佬完成夢想，接手打理診所生意。
投資二千萬
當年拍劇做玉瑩小主，Gigi塊面都冇現在咁V。
首次開分店，Gigi一共投資了二千萬，除了每月鋪租要四十多萬，其餘大部分資金主要引入新款美容儀器，另外自從成為母親後，Gigi特別關注小朋友健康，於是增設BB醫療激光服務，幫小朋友去除胎痣，改善皮膚過分色沉症狀等BB做療程。
「Gigi好瞓身去搞呢間鋪，之前成日同啲同事開會，傾到凌晨一點先收工，佢又要兼顧湊女，所以每晚六點，都會返屋企交人，陪老公同三個女食完飯，講埋古仔氹女瞓覺，又再僕返公司繼續開會。」一名診所職員說。
就快踏入四十三歲，但黎姿無論樣貌同身材，依然保養得宜，面上零皺紋之餘，更擁有女人們最愛的V煞面。
「因為Gigi要做生招牌，當然要keep好啲，每次有新機推出，佢會第一個舉手做白老鼠，親身感受嚇效果得唔得，佢話如果自己冇試過就叫啲客去做，萬一效果唔好，佢會過意唔去喎。」Gigi身邊人說。
當場灑淚本週二（二十日），Gigi的新店舉行開幕儀式，提到○七年細佬黎嬰發生交通意外，要她獨力繼承細佬未圓的夢想時，Gigi忍不住感觸落淚。
「當年我細佬遇到意外，命運驅使下接手診所生意，當時係我人生低點，我從來冇返過辦公室，亦唔識睇會計數，睇住啲數都喊，唔知點好，細佬昏迷頭三個月，我不停匯報診所嘅事俾佢知，細佬聽到公事嘅情況，都會有反應……我唔想放棄佢一番努力，默默等佢有朝一日可以好番，企起身同大家講嘢。」Gigi說。
講完細佬，Gigi亦破例講老公馬廷強及三個寶貝女，「依家生活好充實，除咗瞓覺嗰八個鐘，其餘時間就係家人、老公、公司、接小朋友放學，陪佢哋游水。（老公生意上有冇俾意見？）佢有時見我做嘢做到半夜，就好心痛，問我點解唔瞓覺，點解繼續經營診所，點解要堅持，不過最後佢都俾我感動到，支持我！」
當講到細佬同初期做生意遇到困難，Gigi忍唔住當場喊出來。
Gigi一班好友陳法蓉、鄺文珣、黃佩霞及張晉等人，都有俾面出席。
甚少公開露面的Gigi，在新店開幕時，罕有露背性感打扮。
Gigi兩個孖女就快四歲，細女都差不多兩歲，她除了打理生意外，大部分時間都用在湊女，早前就帶孖女去海洋公園玩。
Gigi表示老公有問佢點解仲繼續做診所，但Gigi解釋做診所目的唔係單純生意而係想幫到人，最後都得到老公支持。
有賺有蝕藝人愛從商做老闆，雖然「明星效應」慳番唔少廣告宣傳費，但唔係個個做生意都一定成功。
譚小環 掂
94年港姐冠軍譚小環，近年離開無線，在銅鑼灣開魚蛋檔殺出血路，開舖第一個月，營業額已有34萬，扣除開支，有4萬蚊收入，多過無線的1.8萬月薪。
張玉珊 掂
01年，張玉珊退出娛樂圈從商，創辦修身堂控股有限公司，成為香港最年輕的CEO，近年業務更遍佈全中國，在杭州、北京、上海等地都有分店。
谷祖琳 掂
08年進軍飲食界的谷祖琳，同阿叔谷德昭夾份在大坑開甜品鋪「小甜谷」，明星效應帶挈下，生意愈做愈旺，後來更與媽媽在同區開設「谷媽媽小店」，主打平價住家菜。
陳淑蘭 執笠
08年，陳淑蘭拍住好姊妹寇鴻萍在中環蘭桂坊開設酒吧Fevar，但開業後有傳寇鴻萍唔肯分錢，賬目不清，後來酒吧更淪為鋼管舞及濫藥蒲場，自10年發生迷姦案後，最終結業收場。
李麗珍 執笠
99年，李麗珍進軍美容界，開設美容院「珍美」，但零投資經驗的她，04年發現美容院被友人擅自改名，連私人戶口亦被人盜用，最後美容院亦關門大吉。
撰文、
