薛凱琪（Fiona）早排幫now去韓國拍特輯，有工作人員向馮仁昭爆料，狂數Fiona擺款三宗罪：唔肯同枱食飯、唔肯同坐大巴、嫌凍拒落車拍攝，工作人員話：「佢話好凍唔落車，最後落車40秒講咗一句對白就走，工作人員都呆咗，又唔係冇畀錢佢，佢係收足正常價錢拍攝。」
馮仁昭噚日打電話畀Fiona了解，佢呼冤話：「好驚訝好唔開心！每晚拍完同事都問有冇需要食飯？佢哋覆話我有選擇係咪一齊食，我唔係social嘅人，食飯唔係工作，所以冇一齊食。至於話我唔肯同車真係莫名其妙，每個藝人做嘢都有車，我坐乜車係電視台安排，相信公司同電視台一早傾好，如果要我會一齊坐。」
薛凱琪否認有擺款，覺得好驚訝同好唔開心。
「呢個世界冇得呃人」
第三宗罪話佢嫌凍唔肯落車拍攝，Fiona澄清：「落車前我有講好凍，因為落雹，喺室內拍會唔會好啲？問完之後我即刻落車拍，講咗opening對白，冇叫我留低講其他，冇要求我喺條街行。」
對於被指擺款，Fiona委屈話：「我覺得呢個世界冇得呃人，之前話我頸長都一笑置之，唯一令我最心痛係話我工作操守、專業道德同人格，呢件事令我好傷心，估唔到入行十年畀人投訴冇一齊食飯，我叫自己唔好放到咁大、唔好喊，用開心嘅態度面對。」
from:
http://hk.apple.nextmedia ... 140520/18725615
