周柏豪最近歌而優則演接拍新戲《四非》，大家睇個戲名唔好以為套戲同打牌有關，「四非」加埋即係個「罪」字，部戲係驕陽出品由新導演黃柏基執導，柏豪喺戲中亦唔係做「大文豪」，反而要放棄靚仔形象做爛面殺手，仲要拍露股及自瀆劇情。
戲中講柏豪天生有爛面缺陷，電影公司搵咗台灣特技化妝師幫佢化爛面妝，每次化成三個鐘，第一次化加上柏豪喺泰國拍猛流汗，直踩拍成十幾個鐘，結果搞到皮膚敏感，有苦自己知。今次柏豪唔單止要爛面，佢仲要拍露股同自瀆鏡頭，真係好大膽嘅演出，聽聞柏豪喺泰國期間仲專登晒吓個靚股，希望以最佳姿態示人。
柏豪喺戲中嘅爛面妝相當嚇人。
出戰另類電影展
柏豪噚日受訪話講到有多場大膽戲：「其實我拍戲冇底線，自己都喪喪哋，只要我鍾意個角色就OK，當日我睇劇本就覺得好大挑戰，同埋我一向都想演殺手角色，戲中有機會開槍同身上裝反應彈俾人射。」雖然話冇底線，但柏豪演露股同自瀆鏡頭都有女角在場，唔多唔少會尷尬。聽聞新戲會參加釜山及東京電影節，另外亦出戰一啲香港另類電影展，希望柏豪咁大犧牲可以有好成績。
柏豪曾經喺個唱騷肌，今次拍戲就要露股。
喺新戲《四非》中，柏豪飾演殺手。
from:
http://hk.apple.nextmedia ... 131106/18494871
