最近專欄作家李純恩同音樂人周啟生都話樂壇已死，樂壇真係唔爭氣，成日俾人質疑抄歌，周柏豪幫容祖兒作曲嘅新歌《天窗》，俾讀者投訴旋律抄關楚耀舊歌《悲哀代言人》，兩首歌旋律似到可以夾埋一齊唱。
馮仁昭問番作曲嘅周柏豪，佢否認抄歌：「流行曲旋律同風格好多相似，唔介意我隻歌俾人話抄，呢個係逼使自己進步嘅方法，我就唔覺得似，兩隻歌都係黃偉文填詞，佢應該覺得冇問題先填，自己會繼續做好音樂。」
周柏豪為祖兒作曲嘅《天窗》，旋律被指抄襲關楚耀舊作《悲哀代言人》。周柏豪將會做小手術割眼瘡。
大文豪生眼瘡
而組合C AllStar新歌《六神合體》其中一句歌詞：「昨日在路邊天真的臉」，都俾讀者投訴抄Beyond金曲《大地》歌詞：「回望昨日在異鄉那門前」，C AllStar解釋：「呢首歌希望向Beyond致敬，所以用咗《大地》歌詞，加強懷念Beyond光輝時代嘅含義。」
另外，周柏豪同顏卓靈噚日現身尖沙嘴服裝品牌活動，大文豪笑稱被嚇親，所以生眼瘡：「我聽日要去割。」
from:
http://hk.apple.nextmedia ... 131010/18457181
