早前50歲嘅導演陳可辛（Peter）竟爆出緋聞，俾內地藝人田樸珺爆佢係閨密，搞到滿城風雨，吳君如仲要出嚟宣示主權，最後Peter要高調出嚟撐君如嘅畫展闢謠，件事先平息。否極泰來Peter早幾日喺武漢舉行嘅「第29屆金雞獎頒獎典禮」，憑《中國合伙人》獲得最佳導演獎，成為第一位港人攞嗰個獎，認真威威！
前日凱旋回歸、心情大靚嘅Peter就客串咗一日做湊女公，而君如就應該仲趕拍緊同鄭中基合作嘅賀歲片。前日下晝5點半左右，Peter同7歲囡囡陳是知坐住架七人車去到銅鑼灣皇室堡商場。之後佢哋冇同強國人逼名店，而係去咗HMV睇影碟。
陳可辛前日帶囡囡是知喺銅鑼灣睇碟，培養囡囡對電影嘅興趣。
買完急返歸
細細個嘅是知已經秉承父風，對電影好有興趣，不過當然係集中睇迪士尼卡通片同埋Thomas& Friends嘅細路仔電影，一買仲買咗四、五隻，認真豪氣。而Peter只係買咗一隻西片同埋啱啱入圍金馬獎、杜琪𥧌嘅作品《盲探》。行咗大約半個鐘之後，兩父女去到櫃位畀錢，等緊嘅時候佢哋對櫃前嘅《鐵甲奇俠》模型睇咗一陣，之後兩父女上車返屋企煲碟。
陳可辛畀錢時，是知悶到踢腿。
陳可辛同囡囡鬥掃碟，唔怕冇話題啦。
吳君如同陳可辛經常帶囡囡出席活動，大晒幸福。
from:
http://hk.apple.nextmedia ... 131003/18447380
