陳豪連日拍戲趕搵奶粉錢，趁住小休，戴頂帽就出街睇傢俬。落單俾錢時，佢再三問店員係咪可以準時到貨。梗係，老婆就嚟返，唔遲得㗎！
媽咪姐
陳豪買定過萬元BB牀 陳茵媺返港待產佗住5個幾月豪種嘅陳茵媺（Amiee），將於一星期內返香港安胎待產。準爸爸陳豪為咗迎接新生命，4月尾就用3,368萬購入大埔比華利山4,000呎獨立屋，收樓後「嗱嗱聲」裝修，今個月中已順利入伙喇！
媽咪姐八到榮升爸爸嘅陳豪，對豪B非常豪爽，買完海景大屋後，再聽朋友意見，用$12,800買丹麥皇室御用嘅Leander BB牀，反而自己同Amiee張大牀都只係幫襯IKEA。早前，佢就單拖去咗沙田間IKEA掃貨，專攻大型嘅傢俬，睇大牀同衣櫃時，都拎把軟尺出嚟左度右度，一啲都唔求其。落單時，仲同個售貨員研究咗成粒鐘，唔少人見到佢都即刻拎晒電話出嚟影相。陳豪唔單止唔介意，仲好有禮貌同人笑。
周二（24日），陳豪出席品牌活動，媽咪姐問佢係咪去IKEA買傢俬為老婆返港待產做準備，佢笑晒咁答：「係呀，不過BB牀唔喺IKEA買啦。我新屋入伙嘛，所以好多嘢需要睇，但就唔係BB牀，買咗好多其他嘢，新屋有排執，好多箱都仲拆緊。坦白講，我都幾多嘢！好彩有我哥哥、媽咪幫手。（係咪買Leander BB牀？）唔話得俾你聽噃。（香港book咗醫院未？）都唔話得俾你聽噃。（咁有咩可以話俾大家聽呀？）佢好快返，清晨5點機，到時會話俾你哋知。」
好啦，見你咁廿四孝，就等你同茵媺嘅好消息嘞！
上兩個星期，啱啱同大家分享咗天后陳慧琳IKEA掃貨事件簿，呢日媽咪姐見到陳豪喺沙田IKEA出現，已經唔再驚訝嘞。見佢睇衣櫃非常認真，猛問店員啲間隔可以點改。最終扑槌，買咗呢個趟門大衣櫃，盛惠$6,155。對陳豪嚟講，抵到爛啦！
$6,155
除咗衣櫃，陳豪仲去睇大牀、碌架牀等，為主人房、工人房諗定布置。大學讀設計嘅佢，鍾情簡約設計，呢款油壓牀最得佢心，盛惠$4,390啫！
$4,390
陳豪近期密密做，呢日出品牌活動，又收到親子手鐲做禮物，難怪佢回應時笑到見牙唔見眼，「我已經期待好耐，Amiee返嚟同BB出世，今年太多開心事！」
跟埋陳豪出活動嘅豪媽，一樣笑到四萬咁口，猛同職員講未來孫仔，又話要送金器。
陳茵媺他條養胎當陳豪喺香港日拍夜拍新片《點對點》，又狂接品牌活動賺錢時，陳茵媺就喺加拿大悠閒度日，好彩佢仲記得post相上微博，等大家感受吓乜嘢叫幸福啫。
Amiee最friend嘅，係讀書時嘅同學仔。趁住喺老家多倫多安胎，不時約同學仔食飯睇藝術展覽，順便胎教。
陳茵媺中秋有喜，不過唔係生得，而係屋企有小狗出世，so cute㗎。
郊遊吸新鮮空氣，係孕婦最佳活動！Amiee梗有做。睇吓個肚仔，凸起晒嘞。
老婆安胎，老公搏殺！陳豪大熱天時着冷衫戴頸巾拍《點對點》，都咪話唔辛苦。《蘋果日報》圖片
丹麥皇室獲獎BB牀陳豪寧願辛苦搵錢慳自己，都唔會慳個B。經過多番諮詢後，據知佢揀咗丹麥皇室都用，香港區由天后Kelly做代言嘅丹麥設計品牌Leander出嘅橢圓形BB牀！呢張牀最特別係備有4件家具，可以隨住小朋友成長而組合成唔同嘅大細，攞晒獎㗎，又潮又實用呀！
$12,800
