一向是「愛夫號」的蒙嘉慧（YoYo），前日已急不及待揀定蛋糕，與下星期生日的老公鄭伊健慶祝兩人婚後首個生日。昨日她和霍啟剛出席活動時，又大爆為了跳傘一事和伊健大耍花槍，而榮升爸爸的霍啟剛亦不忘晒恩愛，讚郭晶晶是「滿分老婆」。
鄭伊健下周生日，太太蒙嘉慧前日已預訂蛋糕，為慶祝婚後首個生日做好準備。
蒙嘉慧前晚6時被發現獨自現身銅鑼灣街頭，見她直入蛋糕店，原來她為了下月4日生日的鄭伊健訂蛋糕，認真sweet！慳家的YoYo亦無四圍逛，揀完蛋糕即畀錢走人。而昨日她與霍啟剛到中學出席活動，YoYo更和學生玩拔河比賽，在對手讓賽下成功贏出，她笑言：「我冇諗過會贏o架，細個玩咩運動最多都係第四名。」
護夫耍花槍
早前伊健在澳洲玩跳傘，YoYo笑言怪他無「事先啟奏」：「嗰日佢打返嚟話跳完傘，仲話陳小春問准咗老婆先跳。我話小春都有問吓老婆，我就淨係有人跳完通知我囉，佢話因為我未瞓醒喎。」不過YoYo隨即又為老公講好說話：「不過對佢嚟講，係好簡單嘅運動，反而佢喺日本拍戲，試過要跳落山，佢話諗緊用唔用替身，我都話用替身好啲，始終演員唔係無所不能。」
鄭伊健、蒙嘉慧
晶晶100分
至於霍啟剛與郭晶晶的愛兒前日滿月，啟剛表示無特別慶祝活動：「返屋企同咗嫲嫲（朱玲玲）食飯，爺爺（霍震霆）飛咗去北京。」他又指運動員出身的晶晶身體回復得好，希望稍後可以一家三口去旅行，並大讚她是100分老婆：「佢餵人奶好辛苦，半夜三更兩點、五點幾都要起身，我就一覺瞓天光，呢個月辛苦佢喇。」他又笑言獲朱玲玲送相機：「部相機大到我唔識用，唔知係咪想我分擔吓佢影相嘅責任！」
蒙嘉慧帶領中學生勝出拔河比賽。
霍啟剛講起囝囝表現興奮。
from:
http://orientaldaily.on.c ... /00282_011.html
