新婚的陳豪與陳茵媺7月中在多倫多擺酒不久，陳豪即撇下懷孕的茵媺返港搵奶粉錢兼打點新居，懷孕5個月的茵媺昨晨返港待產，愛妻號陳豪天未光即親往接機。分開兩個月，陳豪忍不住輕撫茵媺隆起的肚皮，一同返回價值3,300萬的愛巢，甜蜜幸福滿瀉。
懷孕5個月的陳茵媺昨晨5時許，在爸爸陪同下由多倫多返港，陳豪前晚拍電影《點對點》至深夜11時收工，小休幾小時即親到機場接機，現場還有半百傳媒，戴黑超、穿黑色鬆身裙的茵媺甫出閘即加快腳步搵老公，只見肚凸凸的茵媺健步如飛，體形未變，依然面尖手腳幼，只是小腿有點水腫。
陳豪昨日捱眼瞓，天未光就到機場接懷孕5個月的陳茵媺，更拖實嬌妻輕摸她隆起的肚皮。
在港生B陳豪陪產
分開兩個多月，茵媺與陳豪一見面即十指緊扣相視甜笑，陳豪更忍不住伸手摸一摸茵媺的肚皮，認真甜到漏！二人亦不介意跟傳媒分享，大方任影，茵媺不經意騷了手上的結婚鑽戒，幸福之情感染現場所有人，及後還與一眾記者來個大合影，堪稱圈中最受歡迎伉儷。
【呵護肚仔】
分隔兩地兩個多月，陳豪見到老婆陳茵媺，即忍不住拖手仔兼摸下個肚仔。
【拖實任影】
甜到漏的陳氏伉儷幸福滿瀉，大方任影。
有傳茵媺為陳豪懷了男胎，不過二人不願透露詳情，問到BB性別時，茵媺說：「未知，我哋睇埋醫生，遲啲慢慢同大家再講。」但無論仔或女，他們已為BB諗好英文名，決定在香港生？茵媺口快快說：「都係㗎喇。」但身旁的陳豪即改口：「遲啲先、遲啲先。」至於順產還是擇日開刀，陳豪同樣答：「呢個都係遲啲先。」但茵媺卻透露老公一定會入產房陪產，陳豪面紅紅地表示會親手剪臍帶，不怕血淋淋場面？他笑言：「我演過好多次醫生喎！」
【粉絲衝前】
粉絲見到茵媺和陳豪，即上前要求合照。
【面都紅晒】
講到入產房，扮過醫生無數次的陳豪，都緊張得面紅。
談到陀B情況，茵媺承認初期辛苦：「頭幾個月係咁攬住個廁所嘔，哈哈哈！但之後都好舒服、好relax。」陳豪曾說考慮為老婆影大肚裸照，茵媺聞言望着老公一臉疑惑，嚇得陳豪連聲說：「唔係呀，你（記者）唔好亂嚟呀！」茵媺即刻幫住老公，她笑言：「呢個都唔似佢提議，你曳呀！不過maybe，可以留個紀念，但都係睇咗醫生先。」
【爸爸幫手】
茵媺由爸爸（右）陪伴返港，稍後媽咪也回港照顧她。
【挺肚上車】
曾攬住廁所勁嘔的茵媺，明顯已回復狀態，未見過肥。
【齊返愛巢】
陳豪待新居裝修完畢才讓老婆返港，昨晨接她一同返大埔愛巢。
大肚接job身價20萬
做完訪問，陳豪即拖住茵媺離開機場，約早上6時許返到大埔比華利山別墅新居，陳豪早在4月時以3,300萬元購入建築面積4,000多呎的獨立屋，原本茵媺計劃上月返港，但新居需花3、4個月裝修，為免動胎氣，陳豪待工程完工才讓茵媺返港同住。
由於陳豪仍要努力工作搵錢，在港安胎的茵媺由同回港的爸爸幫忙照顧，媽咪亦會稍後回港。據知茵媺雖大肚，但仍會接輕鬆工作，包括一手錶活動，且大肚豪嫂的身價亦勁升4、5倍，約收20萬港元。
採訪：藍文浩、畢紹基
攝影：葉君海、楊浩賢、朱志聰
from:
http://hk.apple.nextmedia ... 130929/18442376
