鄭嘉穎上月尾（8月27日）返TVB與過氣女友佘詩曼拍月曆，據知當日拍完月曆後，鄭直上八樓向樂易玲解畫，陳述連推兩劇的原因。之後，鄭嘉穎獨自到西餐廳煲煙，撞啱本身friend底的黃浩然，鄭即皺晒眉拉實對方吹水。
娛樂喧
推兩劇辣㷫無綫 鄭嘉穎急返娘家耍冧前年，兩屆視帝鄭嘉穎憑內地劇《步步驚心》飾演「八爺」一角爆紅後，中港片約源源不絕送到，每集片酬更飆升至35萬人民幣。
人紅氣焰大，鄭嘉穎先後推了兩套無綫劇《寒山潛龍》及《忠奸人》，因而辣㷫一手提拔他的監製王心慰。
今年他主演的國產劇《葉問》在內地播出後，劣評如潮兼收視仆直，嚇走不少內地製片商。內地冇運行，本刊發現鄭嘉穎日前頭耷耷返無綫，據知此行除拍宣傳片外，還要與珍姐、樂小姐耍冧，認真慘情。
見煎pan收聲和黃浩然傾密偈期間，已取代鄭嘉穎、現時是監製王心慰頂頭愛將的陳展鵬（右一）路過，鄭嘉穎即收聲，望實對方，待陳展鵬走開才繼續和黃浩然密斟。
11年鄭嘉穎憑《怒火街頭》奪三料視帝，同年拍罷《怒火街頭2》後，他高調宣布將會長駐內地拍劇搵人仔，除自資在內地開工作室，自己接劇本做演員之外，亦請人寫劇本，自覓演員接劇，將自己打造成「娛樂大亨」。短短年半間，他一口氣接了五套內地劇，狂賺4千萬人民幣。早前，更暴發戶上身，豪擲3千萬在港美連掃三個物業。不過，名利雙收的他，卻沒有向無綫投桃報李，應承為無綫拍劇，臨門卻甩底。據知此舉觸動了兩大高層曾勵珍及樂易玲的神經。
連環推劇
辣㷫樂易玲鄭嘉穎一直和樂易玲關係良好，二人更試過被拍得在上海high tea，但由於鄭接二連三推無綫劇，令一直痛錫他的樂小姐左右做人難，因此急召對方回巢解畫。
早前，本刊已經踢爆過鄭嘉穎拒剃頭推拍古裝劇《寒山潛龍》，引起製作部（戲劇製作）總監曾勵珍不滿。據知現正拍攝中，由王心慰監製的新劇《忠奸人》亦曾找他演出。鄭最初應承，當時監製還為他訂造一個戇直警察好角色，但鄭臨時以拍內地劇撞期為由再推拍。據幕後人員透露：「嘉穎推咗《寒山潛龍》，都應承咗珍姐下套唔會再推。早幾個月Amy（王心慰）見前幾年套《與敵同行》收得，想搵番郭晉安同鄭嘉穎呢對視帝拍檔拍《忠奸人》，安仔繼續做反派，嘉穎就做警察，好多動作場面。不過嘉穎一聽到要打就話自己內地劇未拍完，要下年先有期，激到Amy姐同珍姐跳起。02年嗰陣鄭嘉穎剛剛入無綫，經理人約都未簽，係得Amy睇起，幾套劇連續搵佢孭飛。依家佢紅咗就唔識人，唔嬲就假。最後Amy咪搵演慣差佬兼肯搏命嘅吳卓羲頂佢囉。珍姐講到明話下次啱用都未必搵嘉穎，驚佢又玩嘢縮沙。」
對於執二攤替鄭嘉穎演《忠奸人》，吳卓羲一味說「唔知」，不過他表示：「我係全劇最辛苦嗰個，好多動作場面。我同安仔入面有好多鬥法，戲份都唔會少。」
無後盾𢱑無綫
秘密入養和除了和無綫鬧僵，一直在大陸拍劇的鄭嘉穎近日身體亦有小毛病，上月尾（8月30日），他秘密到養和門診求醫，逗留一小時後離開。
與無綫還有兩年經理人約的鄭嘉穎，一直扭計唔肯返娘家拍劇。據知近期卻情況逆轉，皆因他孭飛的國產劇《葉問》在內地播出後，收視不濟，更有不少網友將他、黃秋生及梁朝偉等「葉問」比較，笑他睇得唔打得，令原本想搵他拍續集的《葉問》製片商亦急急打退堂鼓，另覓演員參演。
不過最致命原因是他的大爺性格，年初導演李力持就曾公開在電台狂數鄭嘉穎：「我知佢經常改劇本，不過練好啲普通話，能夠同劇組打成一片先啦！」明踩他擺款兼國語屎。據知除《葉問II》外，早前《步步驚心》原班人馬拍續集，但劇組亦飛起鄭嘉穎。截至6月尾，鄭嘉穎拍完《華胥引》後，便一直留在香港放假至今。上月，本刊更拍得他在電視城現身。
據知情者說：「嘉穎拍完月曆，即刻收到樂小姐（樂易玲）call，上八樓見佢。雖然樂小姐同嘉穎本身好熟，嘉穎推劇亦唔係好關樂小姐事。不過上頭施壓，樂小姐惟有搵嘉穎照肺，話佢咁樣推劇，冇監製會再搵佢。」據知鄭嘉穎亦主動搵珍姐耍冧，並口頭答應明年初會為她旗下監製拍一套劇。雖然鄭嘉穎出名麻煩友，不過隨住謝天華離巢，林峯及陳豪未動筆續約，無綫無奈亦要「誠邀」鄭嘉穎留低。
到截稿日，本刊仍未收到鄭嘉穎及樂易玲回應。
吳卓羲執二攤鄭嘉穎辭演《忠奸人》，無綫即搵吳卓羲頂上，日前吳出席《忠》劇開鏡儀式時，仍未知自己執鄭嘉穎二攤的他，和劇中女主角田蕊妮有講有笑。
有劇做就得對於執二攤一事，吳卓羲淡淡定說：「其實有劇做就得，拍劇做乜都冇所謂，最緊要係有好角色。」
監製封嘴對於鄭嘉穎推自己套新劇《忠奸人》，多年前在《烈火雄心》系列一手提拔他的監製王心慰對記者只拋了句：「依家套劇都定晒卡士啦，我唔會再講其他人啦！」
曇花一現去年，鄭嘉穎挾住兩屆視帝闖內地發展，吸引不少製片高價搶用他。可惜其人氣無以為繼，加上由他孭飛的內地劇《葉問》冇收視冇口碑，不少製片紛紛易角用其他演員。
《步步驚情》（冇份）
11年鄭嘉穎主演的《步步驚心》在內地爆紅，其「八爺」形象深入民心，劇集今年還開拍40集《步步驚情》。不過有傳他與拍檔吳奇隆和劇組不和，最終只有對方有得留低，冇得拍續集的他白白送走1,400萬人民幣。
《葉問2》（易角）
去年，鄭嘉穎拍《葉問》傳出不少是非。有指他「唔打得」搵替身，在內地播出後，更劣評如潮，不少網友直指他冇料。原本鄭嘉穎以50萬人民幣一集拍續集，但有傳林峯將頂替他。如以50集計算，令他損失2,500萬。
