【柴可夫】
食完下午茶齊齊坐嘉穎車走，唔知係咪趕下場呢？
【大坑】
鄭嘉穎同陳凱琳（Grace）上年因為合作拍劇墮入愛河，據悉今次嘉穎相當認真，視對方為結婚對象，𠵱家兩人處於熱戀階段，經常被影到甜蜜拍拖，日前佢哋就喺大坑被本報影到一齊嘆下午茶。
【密密食】
嘉穎難得放假，把握時間同Grace過二人世界。
【轉靚位】
滿足完記者影相之後，佢哋返咗私家位繼續食。
大方任影
當日約下午4點幾，記者發現嘉穎同Grace喺一間賣麵包嘅咖啡室歎咖啡，最初兩人坐喺近門口嘅座位撐枱腳，兩人有說有笑，之後發現有記者影相，兩個人好有默契咁笑笑口畀記者影相，相比起以前每次拍拖斷正都黑面嘅嘉穎，今次變得友善得多，可能係想同大家分享佢哋嘅甜蜜。滿足咗記者之後，兩個人想要個較寧靜嘅空間，兩人選擇搬番入咖啡室內嘅吧枱坐，店員睇嚟同佢哋非常熟絡，主動行埋去傾偈，當店員見門外有記者影相，仲主動幫手將窗簾拉低。
大約5點左右，鄭嘉穎就埋單兼為女友開門，嘉穎喺女友手中接過紙袋仲順勢拖住，佢哋拖實走到另一個街口攞車，火速踩油離開。最近嘉穎仲放緊假，所以有時間拍拖，據悉內地一直有電視劇搵佢演出，但就未揀到啱嘅劇本，同時今年佢都希望可以有機會參與拍電影。
採訪、攝影：畢紹基、吳耀輝
【埋單走】
粗重嘢由嘉穎做番，Grace梗係笑得甜。
【拖到實】
兩個人由踏出餐廳一刻起就已經拖到實。
from:
http://hk.apple.nextmedia ... 160228/19508699
