黃耀明同何韻詩嘅大愛同盟推出新書《大愛同誌》，為咗爭取同志平權宣揚大愛精神，佢哋分別同影帝影后赤膊埋身拍海報「ALL4LOVE．同為愛」，海報率先喺本報曝光，明哥同黃秋生赤膊相擁，何韻詩就同最近分別同謝霆鋒、梁朝偉傳緋聞嘅周迅扮咀嘴，佢哋喺臉上畫咗LOVE彩繪，演繹攣直色相。
周迅（右）同阿詩扮咀嘴的海報甜蜜蜜，宣揚愛冇性別之限。
女咀女男攬男
赤膊上陣攬秋生嘅明哥笑住話：「好興奮！唔使warm up，秋生係影帝帶我入戲，初時我以為自己會尷尬，咁耐冇演戲就要剝衫，仲逼佢扮基。」原來明哥同秋生多年前曾合作玩音樂，當時秋生翻唱陳秋霞《偶然》，係由明哥做監製。今次直人秋生為愛捐「軀」撐同志，秋生蠱惑話：「你點知我係直？捐出我第一次畀明哥，好多人都等住。」
至於周迅就同何韻詩扮咀嘴，阿詩嘴角寫上Love扮鬚反串做賈寶玉，周迅喺肩膊黐咗彩貼扮林黛玉，兩人依偎相貼，明哥讚佢哋係美女組合，兩女聽到即刻開心拍手，海報由名攝影師夏永康操刀，將於周五（16日）首賣為大愛同盟籌款，明哥同阿詩會現身銅鑼灣誠品書店舉行簽名活動。
秋生（右）企出嚟撐同志平權，同明哥赤膊擁抱大愛。
明哥（右）笑言逼秋生扮基，兩人喺臉上畫咗LOVE嘅彩繪。
明哥讚何韻詩（左）同周迅係美女組合，被阿詩笑佢自誇美男子。
from:
http://hk.apple.nextmedia ... 130813/18375914
