鄧萃雯之前因為無綫重頭劇《金枝慾孽貳》收視差而跳船，辣㷫劇組，連一向俾人感覺與世無爭嘅黃德斌都忍唔住喺微博發火寸爆雯女，事件隨住《金枝貳》播完而告一段落，不過件事就令到雯女形象下跌。
雯女前晚喺車入面不斷化妝補粉，化足45分鐘先落車。
主攻相機
前晚7點幾，記者發現雯女嘅座駕喺圓方商場停車場出現，車入面得佢一個，素顏嘅佢喺車入面一路玩微信一路化妝，搞咗大約45分鐘雯女先落車，不過佢明顯冇乜手尾，將化妝用嘅紙巾就咁放喺車頂，之後就走咗去，雖然雯女叫做執靚咗個樣，不過戴住橙色cap帽、着T恤牛仔褲嘅佢個樣望落都幾殘。
雯女全程又微信又講電話，好忙喎！
雯女將用完嘅紙巾（紅圈示）放喺車頂就走。
之後雯女去到商場內電器舖睇相機，見佢主攻都係近年潮流興嘅M4/3相機，但佢睇咗幾部都唔啱心水，而店舖搵咗三個男職員輪流招呼佢，後來雯女似乎對一部高階M4/3相機幾有興趣，但見店員打個電話後雯女表情有啲失望，相信係冇現貨喺舖頭，最後雯女惟有意興闌珊咁離開。
採訪、攝影：李志明、吳耀輝
雯女專睇相機，店舖仲派咗店員輪流招呼佢。
雯女攞相機試到清清楚楚，可惜最後都冇收穫。
from:
http://hk.apple.nextmedia ... 130806/18365250
