鄧萃雯演技好係人都知，近年佢經常成為「情緒病」嘅代言人，佢對人、對自己都要求高，成為佢致病嘅原因，而十年前，《金枝慾孽》同黎姿爭視后一役，好多觀眾仍然印象深刻，原來呢件事，一直都放喺雯女個心入面。
噚日有報道，影到雯女上月去溫哥華擔任一個教會佈道會嘅演講嘉賓，喺演講期間，雯女將拍電視劇多年來嘅鬱結都講晒出來，原來佢對10年前嘅《戀愛自由式》都有心結，佢話:「作為一個女演員真係幾慘，三十幾歲都仲好靚女嘅時候，就已經派你去做阿媽，仲要係生陳文媛，唐寧嗰啲，我都唔知點生得佢哋出。」佢仲話:「嗰時真係幾冇希望，我一出道就做主角...有一次突然有啲Teenagers走埋嚟叫我auntie，嗰次係我演藝生涯幾大打擊，但我照做，如果唔係連工都冇得返。」
講到04年，《金枝慾孽》如妃一角令佢翻身，當年視后大熱倒灶，俾死敵黎姿攞咗視后，好多人都戥雯女唔抵，原來雯女自己都放唔低，佢話:「我成日都覺得我梗係有實力o架!有晒人生經驗啦，我以前唔忿氣，咁多後輩攞到獎未到我。」擺明不忿黎姿搶走視后，期間拎視后嘅，仲有佘詩曼呢個後輩，直到09年，雯女先憑《巾幗梟雄》四奶奶一角拎返視后。
from:
http://hk.apple.nextmedia ... 130906/18411827
