鄧萃雯之前因為無綫重頭劇《金枝慾孽貳》收視差而跳船，辣㷫劇組，連向來戇直嘅黃德斌都忍唔住喺微博發火，令唔少人跌眼鏡。前晚黃德斌、莊思敏、糖妹同森美等喺將軍澳電視廣播城錄影《超級無敵獎門人終極篇》，黃德斌成為俾人玩嘅目標。
黃德斌起勢狂拍件冰衫，俾志偉笑係金枝衫。
狂拍金枝衫
玩超級無敵過過過時，黃德斌負責着冰衣，佢出盡力狂拍，主持曾志偉笑言：「你當呢件係金枝衫？」錢嘉樂笑埋一份：「諗吓之前你喺沙漠幾熱，𠵱家冰火五重天，如果喺砵蘭街好貴。」林曉峰又加把口：「男人一凍就縮，不如你就叫斌縮，又或者叫冰天斌。」
（左起）商天娥食到標眼淚，糖妹同莊思敏幸災樂禍笑彎腰。志偉玩遊戲時大放笑彈，氣氛熱烈。
後來玩超級無敵勁勁勁時，嘉賓要邊打乒乓波邊講話題，一開波就講《金枝貳》角色名，黃德斌第一個就講雯女嘅角色如妃，認真搞笑！輪到第二個話題講商天娥有份演出嘅劇集，黃德斌甫開口又講娥姐同雯女合演嘅《師奶唔易做》（其實正確劇名係《師奶兵團》），娥姐明玩佢：「我冇做喎，嗰個係鄧萃雯！」志偉即笑黃德斌：「你做乜成日記住鄧萃雯？」
另一遊戲又問嘉賓有冇試過車中親熱，森美揶揄當日楊怡同羅仲謙同車：「我試過一次囉，係謙謙囉，啲人問我，我唔認㗎，不過我係有飲少少酒。」森美又取笑金剛：「我有個舊拍檔阮小儀，你着我舊鞋，大家係襟兄弟。」認真口不擇言。
from:
http://hk.apple.nextmedia.com/entertainment/art/20130612/18293934
