娛樂頂點:無扨密令棄大宇 郭羨妮賣命贖罪
自郭羨妮捲入陶大宇婚變後，聲名狼藉。無線立刻展開救「狸」行動，先讓她停工離港避鋒頭三個月，待其「洗底」才復工。自本月11日返港，郭即與大宇畫清界線，戮力工作贖罪，終於獲無線特赦，繼續力捧。
不過，緋聞男主角陶大宇就冇咁好彩，據知約滿無線的他，慘成犧牲品，無線鑑於風頭火勢，已暫定唔同大宇簽約。為愛情賠上婚姻、形象及事業的他，成為大輸家！
郭羨妮11日晚從溫哥華返港再戰江湖，連日來工作排得密麻麻，不是出席活動就是返公司開會。戮力洗底的郭羨妮不但毫無怨言，更聽教聽話，加上她與無線合約還有兩年多，所以高層決定給她一次改過自新的機會。
17日（周二），下午三時，本刊發現郭羨妮與母親返無線開會，兩人在會議室逗留了個多小時才離去。記者上前訪問，遭經理人擋駕，而郭則強擠笑容，不發一言。
樂小姐教路
據知情者透露，當日的會議高層雲集，包括製作資源部副總監樂易玲、郭羨妮經理人Derek 、還有掌管劇集的兩大巨頭曾勵珍及梁家樹。據知會議內容除了安排她下半年的工作外，還為郭進行心理輔導，教這陣子日日被追訪的郭如何應付記者。
知情者說︰「樂小姐好錫郭羨妮，除咗安排佢響嚟緊嘅長劇casting 外，還叮囑佢日後小心處理感情，以免再有負面新聞。又叫佢醒啲，唔好同記者再講陶大宇，以免愈描愈黑，最好係用微笑回應，等啲人快啲淡忘件事！」
SMS 箍煲
郭羨妮斬纜態度決絕，但據知大宇仍暗中望箍煲，大宇友人話︰「佢（大宇）好傻，人哋（郭羨妮）都唔理佢，連電話都唔接，佢仲不斷send SMS 望復合，咁咪盞累咗自己！」大宇未死心，難怪郭羨妮母親連日來廿四小時全天候𥄫實愛女，跟出跟入，看來她唔想女兒再有咩差池。
郭好彩獲放生，但癡心的大宇，今勻卻一鋪清袋。無線鑑於其形象盡毀，加上他與無線只簽部頭約，而拍完《和味濃情》後已約滿，無線已決定棄宇保妮，他惟有返大陸搵機會。
近日，陶大宇已飛赴上海拍攝36集電視劇《義來同心》，一拍就三個月，而《義》劇的另一男主角，咁啱係郭羨妮前男友溫兆倫。兩男一個為郭羨妮拋棄糟糠；一個入住郭寓所，更被指要女友代還債。今次新劇交鋒，兩人響劇中仲要爭女，都咪話唔吊詭。
周二（17日），《義》劇在上海浦東舉行見面會，原本安排男主角陶大宇與溫兆倫同場，但溫卻臨時甩底。據幕後人員爆料，由於第一男主角陶大宇向製作單位表明不想與溫同場，所以最後才安排溫兆倫唔到。但監製鄺業生卻辯稱溫因為仍在北京拍《血色薔薇》，趕不及到上海，但其實此劇已拍完。
避見溫兆倫
至於輸家大宇，唔知係咪有冤無路訴，連日來悶悶不樂，一見記者更躁爆。見面會上，陶大宇勁黑面，多次以大會安排為由，拒絕訪問，其後本刊表示只問工作，他才勉強答幾句。
問到與溫兆倫合作，會唔會尷尬？大宇搶著說：「你哋唔問咪唔尷尬囉！」當問到兩人角色時，陶大宇即扮聽唔到。問到溫失場係咪驚尷尬？陶大宇推說：「你哋問監製啦！我唔知
！」
問到與無線的續約問題，大宇話：「錢唔係問題，有啱嘅劇本同角色至最重要，我同無線合作好好。」經理人幫口撐：「等拍完呢套劇，返香港會同TVB 斟續約。」最後問大宇有否SMS 問候郭羨妮，他忟憎說：「都話唔講呢啲！」。
其實每逢有乜事發生，無線都會先保住簽咗經理人合約的演員，好像早前蔡淇俊與陳自瑤傳出負面新聞，無線一樣力撐簽了經理人合約的蔡淇俊，封殺陳自瑤。今次陶大宇與郭羨妮亦一樣。就棄宇保妮一事求證樂易玲，但至截稿前仍未獲回覆。
密做博翻身
郭羨妮為表悔改誠意，返港後即密密做，7月尾更要到湖南3天，出席電視節目《舞動奇蹟》，風塵僕僕。
7月7日多倫多行騷
於多倫多商場行時裝騷，是郭首次復工的第一炮。當日大會更提前切蛋糕慶祝生日，令她感動落淚，席間她煞有介事向觀眾澄清第三者緋聞。
7月12日西武剪綵
出席西武活動時，擦晒鞋感謝公司支持，更說同大宇「冇機會」及現階段唔會拍拖，斬情絲戮力補鑊。
7月14日長隆乾煎
貴為一線花旦的郭羨妮，與一眾新人及港姐到長隆拍旅遊特輯，紆尊降貴「乾煎」大半天，為討好高層，乜都冇計啦！
父母車輪𥄫
郭羨妮離港後，郭媽媽獨自留港為愛女物色新寓所。11日晚，郭媽媽更特地到機場接愛女返回新居，往後的日子，郭媽媽寸步不離愛女，不許她與大宇有復合機會。香港有阿媽睇住，之前郭羨妮返加拿大洗底則有老竇𥄫住（右圖），大宇想埋身都幾難。
師奶多撐妮
《學警出差》初推出時收視連番受挫，但郭羨妮慘死的大結局，竟有39點（約250萬觀眾），可謂標尾會，而大部分有追看此劇的師奶都撐妮，網上討論區則譭譽參半。
黐妮即死
郭羨妮99年當選港姐冠軍後，被TVB 力捧，情史多籮籮。不過唔少緋聞男友，卻換來沉重代價。
馬浚偉
02年傳因拍攝《帝女花》日久生情，事後女方卻指有人博宣傳，男方更因愛成恨與她反目，掀起連場罵戰。當時有網友踩馬，十足師奶潑婦罵街，形象受損。
溫兆倫
03年合拍《牛郎織女》，溫以菠蘿包攻勢成功奪芳心，但溫
成箭靶被指食軟飯。其後他更要轉戰大陸拍劇，而《牛》成倉底劇，最終被安排在午間時段播映。
馬德鐘
05年有傳二人因拍攝《爭霸》撻著，多次被拍得二人同車及戴情侶太陽鏡shopping 。及後傳馬婚變，馬太帶同兒子避走歐洲，馬更被冠以負心漢之名，事業下滑，在《歲月風雲》中更被刪減戲份。
郭羨妮離去時，經理人Derek （中）上前為她擋記者，並說：「佢今日唔會接受訪問。」直至送郭上車後，才返回office 繼續開會。
7月17日密會高層
17日下午，郭羨妮與母親返回TVB 開會，並遵照高層吩咐封口，對記者所有提問，她一概以笑容回應。不過，呢個笑容睇嚟有啲假囉。
郭神色凝重踏入會議室，而身旁的郭母則全程傍到實，兩人逗留了個多小時才離去。
7月12日Dry 爆睇波
回復單身的大宇好dry ，連日來除了開工，便是約會男性友人。本月12日便與兩名男友人到灣仔睇桌球大賽。
