現年45歲嘅許志安同40歲嘅鄭秀文（Sammi）復合之後經常拍拖周圍去，前晚大概8點半安仔揸住佢部平治C63跑車泊咗喺大坑間鮨辰日本料理嘅後門，富豪劉鑾雄同女友甘比、狄波拉同霆鋒都經常幫襯呢間餐廳，今年3月安仔先帶Sammi同埋準外父外母一家人喺度食飯。
今次淨係得安仔同Sammi撐枱腳，餐飯食到10點左右離開。佢哋兩個由後門走，一馬當先嘅Sammi行出嚟見到記者時，表現得好愕然，加上佢副眼鏡因為有「霞」氣變矇，搞到佢要耷低頭行路。跟住出嚟孭住窩釘背囊嘅安仔發覺被撞破好事，都面色一沉，對記者嘅問題全部唔睬。Sammi一上車就同安仔耳語咗兩句，安仔面容先放鬆番，跟住佢向影緊相嘅記者揮手示意讓路，然後開車離開。
Sammi前晚同男友許志安撐枱腳，Sammi一馬當先離開菜館，發覺被追訪即時呆一呆。原本面容繃緊嘅安仔俾女友講幾句之後，即刻成個人放鬆晒。
網民惡搞催婚
另外，噚日有網民惡搞Sammi同安仔嘅相key上新片《盲探》海報，留言：「許生許太」，歌迷明知玩嘢都紛紛恭喜，希望偶像早日結婚。Sammi回應話有人冒充佢開facebook：「知道冇惡意，但要乖乖適可而止。」
由冷氣地方出嚟嘅Sammi眼鏡佈滿「霞」氣。Sammi同安仔被網友惡搞「許生許太」合照，fans都希望佢哋早日結婚。
from:
http://hk.apple.nextmedia.com/entertainment/art/20130611/18292543
