無綫拍劇出名辛苦，每日有四粒鐘瞓算賺到，但係長期處於睡眠不足頹爆狀態，任你鐵打都好易出事。
最近忙於孖住黄子華拍《My盛Lady》的徐子珊，早前不慎被廠內積水跣低傷及尾龍骨，雖然子珊休息一日後急復工，但據知她其實好擔心手尾長及影響日後生育，故上週四（30日）已急急再找專科檢查，腰傷可大可小，check真啲穩陣呀！
徐子珊上週一（27日）跣低後，要即送將軍澳醫院搶救。事後子珊只休息了一日便復工，但其實她腰傷未癒，33歲的徐子珊更擔心會影響生育，上週四（30日），本刊發現她到中環找專科醫生檢查。
送急症室
30/5睇專科上週四子珊往中環找私家骨科醫生再檢查，之後再會合形象指導Pat到置地試衫，其間見子珊行路仍就住就住，明顯未痊癒。
徐子珊在錄影廠被積水跣鑊甘，有份潑水的黃子華亦有陪子珊入院，事後子華說：「嚇死我，成10分鐘又唔講嘢又郁唔到！」
「𠌥低都痛！」知情者說：「其實醫生畀咗7日假佢，但係你今日唞咗，之後咪踩得仲甘？所以佢腰痛都死頂開工，開頭佢冇擔心話影響生仔嘅，佢去到醫院淨係爆喊，完全唔識問個醫生有冇後遺症，後來俾人問得多先知驚，所以嗱嗱聲搵個專科醫生檢查吓囉！」
據知經檢查後，子珊尾龍骨並沒有移位或裂骨，但附近肌肉仍有腫脹。雖然子珊已經復工，上週五（31日）仍由助手扶住出席活動，對於急搵專科斷尾，徐子珊則說：「醫生話就算裂骨都只可以食藥止痛，𠵱家條腰𠌥低都痛，我會再去覆診，希望冇事啦！」
忍住痛
週日子珊急住為《My盛Lady》復工，30幾度酷熱警告下，子華要着住超厚的毛毛衫扮兔，而腰骨仍隱隱作痛，但仍着住5吋高踭鞋開工的子珊說：「女仔好難唔着嘅！」
31/5上週五（31日）子珊着到鬼咁性感出席活動，她說：「活動係之前安排嘅，情況許可都唔會推job嘅！」
2/6
開廠多意外
藝人拍劇除了外景飛車爆破吊威也易出事外，原來在錄影廠亦有危機，除了陳鴻烈在09年拍《畢打自己人》不幸在電視城內猝死外，秋官及敖嘉年亦曾在電視城「出事」！
鄭少秋 墮山
《蘋果日報》圖片
秋官10年12月拍攝《心戰》時，在錄影廠內不慎由4米假山墮地傷及肩膊送院，需要接受磁力共振檢查，事後秋官說：「因為個假山得四日廠期，所以聽日就要返去開工。」
敖嘉年 膝傷
《蘋果日報》圖片
敖嘉年11年2月拍攝《飛虎》時，在錄影廠內拍攝一場打鬥場面時，傷及膝頭，要call白車抬床送入將軍澳醫院，並需留院接受冰敷及打針治療，事後仲要擔住枴杖復工。
