邱淑貞泊位要人教工多藝熟！做咗老闆娘十四年，平時有司機跟出跟入嘅沈太邱淑貞，好日都唔會自己揸車，但星期一（二十七日）同細女沈星去街，就自己做柴可夫。
下午差不多五點半，邱淑貞揸住架Range Rover，囡囡就由工人抱住，一行三人去咗深灣遊艇會，喺會所大門停低架車，沈太開車門俾工人抱沈星入大堂等，之後自己再轆架車過停車場泊車。由於個車位左邊係貼牆，邱淑貞可能驚揩花架靚車，泊極都攞得唔夠貼，結果要工作人員手口並用教路。雖然架車始終都唔係攞得好直，但靚太有人服侍慣，又唔係考牌，求其隻眼開隻眼閉啦！
現場工作人員教路泊車，搞掂後，邱淑貞俾個手勢示意唔該，有教養！
邱淑貞先照顧好全身Baby Ape嘅沈星落車，又叫工人抱囡囡行入大堂等，唔好企响室外熱親。
