洗米華四圍飛，陪完「唯一」周太陳慧玲（Heidi），又要搵番Mandy Lieu，好識分配時間嘅佢，湊女都係一手包辦。早前有讀者爆相爆片話見到洗米華同大女周梓潼，仲有大女啲同學喺澳門銀河酒店出現，洗米華仲似乎對麥記好有興趣，原來有錢人都唔餐餐要食得豪o架！
好似邱淑貞咁，嫁咗俾沈嘉偉做闊太，仲成為三女之母。不過邱淑貞唔係亂使錢嘅人，有時好識嘆去ifc食下飯，有時又會同家人食魚蛋粉。
育有一仔一女嘅洪欣都好識搵嘢食，7月嘅時候《蘋果》就見過帶一對仔女喺金鐘食中菜，仲叫咗幾份北京填鴨。洪欣早年又試過同老公張浩鋒、仔仔去完工展會，去咗附近食清湯腩，唔夠喉仲轉場去咗食甜品。
同林海峰嘅彭羚就生咗兩個女，雖然久休未復出，彭羚不時都被影到同囡囡行街，試過接囡囡放學之後喺銅鑼灣行園high tea。彭羚平時仲有個嗜好，就係行街市買餸，煮返兩手俾屋企人食。
好媽咪當然唔少得蔡少芬，佢同老公張晉嘅恩愛程度真係羨煞旁人，佢亦都試過被傳媒影到湊兩個囡囡食茶記，仲大聲教女唔可以浪費食物。
from:
http://hk.apple.nextmedia ... 161004/19790627
