邱淑貞（豆斗）成為沈家媳婦後，專心做賢內助湊三個囡囡，前日老公沈嘉偉去咗上海打理時裝品牌生意，豆斗就撇低兩個囡囡，同大女沈月行孖咇喺銅鑼灣shopping。
前日下晝四點幾，45歲嘅豆斗着住I.T代理嘅品牌Hysteric Glamour灰色外套、黑色運動褲，而13歲嘅沈月五官似足豆斗倒模，着住黑tee、紅黑蘇格蘭短裙，佢哋同樣着上Nike波鞋，似足兩姊妹出巡，全程不時十指緊扣，又蹺實對方，母女感情好好。
沈月
沈月一落到老銅地面，即以灰色圍巾包裹臉孔。
避走入倉揀衫
豆斗同沈月齊齊先去銅鑼灣利園睇童裝，沈月警覺性甚高，全程不時四圍望，仲用灰色圍巾「蒙面」包到實，只露出雙眼，唔知係扮潮人，定係預防偷拍嘅造型。兩母女入咗Ralph Lauren睇童裝，蒙面沈月喺舖頭入面冇耐，就發現咗記者，於是同豆斗匿埋喺倉務間揀衫，避開記者視線，最終逗留咗近20分鐘都未有所獲。
豆斗同沈月去咗四樓平台諗住嘆茶，點知去到發現食肆已結業，佢哋尷尬相視大笑，隨即轉場到Cova嘆茶，其間話題不絕，享受二人世界。
from:
http://hk.apple.nextmedia ... 140419/18693991
