呢排無綫啲綜藝節目仲好睇過黃金時段劇集，噱頭多多，暑假期間會搞個藝人版《超級巨聲》嘅《星夢傳奇》，早前仲大鑼大鼓搵咗過百藝人去試音。不過噚日聽聞話節目有黑幕，初賽入圍名單已經被高層點名，包括蕭正楠、王浩信、胡定欣、樂瞳、王君馨、梁烈唯、袁偉豪、羅鈞滿、楊潮凱同鄭俊泓。因為當中有好幾位都做過歌手，甚至出過碟，有啲冇去初選都有得入圍，明顯對其他參賽藝人唔公平。
有傳部份藝員指定入圍，咁大盞射燈照住，仲使乜面試啫！蕭正楠同胡定欣都有唱開歌，入圍冇難度。
自爆冇去面試
面對咁多質疑，蕭正楠好坦白話自己冇去面試，噚日喺電話度話：「即使揀中我都未必有時間參加，因為遲啲要上佛山同上海開工。」佢話《星》係畀人追尋夢想，問到有冇覺得唔公平？佢續撐TVB：「呢個係公司嘅騷，都係一個畀藝人表演嘅地方啫！」至於04年出道做歌手，仲出過兩張碟嘅王浩信，問佢係咪內定俾人點名？佢笑笑口話：「咁正？係就唔使面試啦！」
至於樂瞳同王君馨喺電話中聽到入圍都笑晒，樂瞳話：「聽講啲獎金、獎品好豐富，好想逐步邁向冠軍。」樂瞳就自爆就嚟出碟，問佢係咪唔公平？佢話：「唔會，入選嘅人一定有番咁上下質素，我都有信心。」
from:
http://hk.apple.nextmedia.com/entertainment/art/20130524/18269628
