胡定欣與陳展鵬因合演《城寨英雄》而傳出緋聞，更雙雙成為視帝和視後，被認定是圈中的金童玉女，點知殺出個「程咬金」，陳展鵬趁定欣出埠時，與落選港姐單文柔密會，胡定欣心情難免受影響。
適逢這段時間要拍重頭劇《宮心計2深宮計》，胡定欣可以專心寄情工作，經常拍通頂連踩廿幾粒鐘，本刊發現胡定欣鏡頭前雖然表現專業，不過導演一嗌cut機即刻成個謝曬。
瞌眼瞓
大台重頭劇《宮心計2深宮計》，除了胡定欣、馬國明及馬浚偉等擔大旗，劇組仲重金禮聘周秀娜與劉心悠外援加入，據知為了遷就劉心悠同娜姐檔期，其他演員惟有捱義氣密集式通宵拍攝，早前馬明就大爆曾經連踩27.5粒鐘，認真誇張！
同樣係主角的胡定欣佔戲極多，外景完要接廠景，搞到冇覺好瞓，早前她一身古裝造型的現身美孚公園為劇集拍外景，當日她要同陳煒演技大鬥法，作為視後的胡定欣喺鏡頭前表現專業，大半分鐘對白唔使NG一take搞掂，不過每次導演一嗌cut機，胡定欣就即刻謝曬，仲不時用手捽眼提神，由於戲服通過古裝頭重量不輕，所以等埋位時，胡定欣都費事四圍走，寧願企定定發呆，其間陳煒見胡定欣等到黑曬面，就講爛gag撩佢傾偈，胡定欣先識笑番！
為咗遷就心悠同娜姐兩個外援檔期，作為主角的定欣要經常捱義氣日日通頂拍攝。
幾乎日日開通頂，無覺好瞓的定欣忍唔住捽眼提神。
未正式roll機，胡定欣不時發呆。
捽眼捽到個妝花曬，胡定欣親自補妝。抽空見閨蜜
日日忙住開工，最近又要去橫店趕戲，胡定欣為了拍劇幾乎斷六親，但無論點忙都會爭取時間同班「胡說八道會」閨蜜見面，日前她趁有空檔，仍然以皇后古裝頭造型去會合胡杏兒、胡蓓蔚、黃智雯、姚子羚同李施嬅嚟個Happy Saturday，順便慶祝胡杏兒做媽咪。
「胡說八道會近排要齊人都好難，因為個個分別忙住拍劇登台，不過胡杏兒依家有咗，個個姊妹都好戥佢開心，知唔知收工幾攰都爭取時間飛出去join佢哋，上橫店之前班姊妹又幫佢搞farewell！」胡定欣身邊人說。
上週在定欣出發橫店拍攝前，「胡說八道會」姊妹們齊齊陪定欣餞行。
早前，胡定欣拍劇中途有空檔，她連古裝頭都唔拆就趕去同「胡說八道會」姊妹會合。
同陳展鵬呢頭撻著，轉個頭陳展鵬竟然趁定欣出埠帶單文柔上山頂密會，令二人戀情告吹。
撰文：娛樂組
攝影、攝錄：李溢敏、蕭敬漁、森美
