近日跑馬地玫瑰崗幼稚園兩歲男學生疑被體罰，仲流出一張綁手跪地照，身為兩子之父嘅李克勤就好震怒，佢前晚同趙增熹、鍾景輝、劉兆銘、馮寶寶等人喺中環大會堂出席「2012香港藝術發展獎」。
提到男童被虐照，克勤大反應話：「好離譜，應該以其人之道，邊個先生綁佢就叫佢綁番嗰個，叫佢跪番喺度，起碼嚟個double，完住唔合人道所為，不過都讚揚揭發事件嘅老師。兩歲點可以咁樣，係非常嚴重嘅所為，仲要為人師表，普通人都唔可以咁做，呢啲嘢連外籍傭工都唔會咁做，估唔到發生喺學校內，家長真係要留意吓小朋友喺學校做乜嘢。」
克勤提到男童被虐事件嗰陣好震怒，話應該以其人之道綁番嗰個老師。劉兆銘同馮寶寶前晚出席「2012香港藝術發展獎」。
只會打手板
克勤大讚兒子就讀嘅學校透明度好高，就連門都係玻璃，相信唔會出現呢啲情況，而佢本身教導小朋友時亦只會打吓手板，嚴重啲先象徵式打吓屁股，用意係阻嚇，再大力啲就唔得。
此外，前晚克勤嘅一身服飾由愛妻盧淑儀親自配襯，佢喺現場演繹《大會堂演奏廳》，擔任頒獎嘉賓，頒發「終生成就獎」畀有「大會堂之父」稱號資深藝術行政人員陳達文博士。
from:
http://hk.apple.nextmedia.com/entertainment/art/20130511/18256002
