近年長期定居北京工作、50歲嘅馬來西亞歌手巫啟賢最近因為幫大馬嘅政黨宣傳站台，被大馬民眾鬧係「賣國賊」，早前楊紫瓊都係咁俾人鬧，不過依然冇影響到巫啟賢一家三口同朋友之後返台灣血拼嘅心情。
前日3點鐘巫啟賢帶住老婆彭美君同6歲囡囡樂樂，先去到台北101大樓嘅Dior名店，佢哋喺裏面試墨鏡、鞋同西裝外套，之後當然唔少得同囡囡去買玩具，其間有女粉絲要求合照，巫啟賢都冇托手踭。佢哋一行人仲意猶未盡，繼續轉戰新光三越百貨公司，前前後後行咗超過十間舖頭，行足3粒幾鐘荷包大出血。不過對於近年喺內地搵人仔嘅巫啟賢嚟講都係小數目啫！據知，巫啟賢今次返台灣係因為睇中咗一幢價值1.2億元新台幣嘅豪宅，如果買得成，加埋佢喺北京、上海嘅物業，佢啲樓總值超過3億元新台幣。
行緊街買嘢，巫啟賢都不忘同囡囡玩，睇佢哋笑得幾開心。巫啟賢喺台灣睇過呢層價值過億新台幣嘅豪宅。
難得返台灣，巫啟賢一家三口當然趁機出動血拼。巫啟賢之前幫大馬參選政黨站台宣傳，俾人話佢係賣國賊。
當巫啟賢被記者問到被大馬民眾鬧「賣國賊」，佢話：「你必須要生活在那個地方，這一票投下去才有真正的意義，不然的話隨便投票是一種不負責任的行為。」
from:
http://hk.apple.nextmedia.com/entertainment/art/20130430/18244188
