出道快滿30年的李克勤，早前代表香港參加內地的江蘇衞視《蒙面歌王》歌唱比賽節目，戴面罩扮「白棱鏡」出戰贏得首集冠軍，不過，身為評判之一兼曾為克勤作歌的巫啟賢，竟然在節目中認不到克勤的歌聲，被網民狠批扮嘢，前晚克勤出席母校華仁書院校慶，笑說：「《蒙面歌王》呢啲嘢唔使咁認真，唔使去挑剔啲環節，其實好多嘢仲要改善。」
克勤撐巫啟賢（小圖）已成功為節目製造話題。資料圖片
王敏德兒子躍穎（左）是華仁學生，兩父子更上台合唱籌款。
「冇攞過750萬」
對於能夠製造話題，克勤認為節目已成功，他說：「唔知佢真唔認得或假唔認得，其實都係一個騷啫，或多或少都營造觀眾有得估嘅氣氛，坦白講如果我同佢調轉崗位，我都冇可能第一眼見到佢就話：『嘩，嗰個咪邊個邊個！』咁咪好冇癮。」克勤坦言沒有後悔，將會繼續參加節目。
克勤並主動否認收750萬酬勞的傳聞，他說：「我要澄清冇攞過750萬，不是傳聞中嘅價錢，揼石都有人工，地盤都有人工，總之合理，幾多錢唔係主要，之前都有節目搵過我，都係講緣份。」對於有網民指他去內地搵銀，少了專注在香港，他說：「其實我基本都係喺香港，如果要晉身決賽，都會撞咗9月演唱會，不過到時先算，見步行步。」
此外，專程由日本返港擔任嘉賓的陳美齡表示，兩個姐夫和姨甥都是在華仁讀書，當年自己未做歌手前，華仁都邀她去唱歌，問到那些年是否很受男學生歡迎？她說：「當時好多人話鍾意我，試過有男仔跟我返屋企，自己都好驚。」
採訪：張俊銘
攝影：陳慧安
from:
http://hk.apple.nextmedia ... 150803/19241060
