\陳明恩撼贏本地幫經過5大唱片事件，近年無綫都學精咗，除咗搞三輯《超級巨聲》力捧許廷鏗、林欣彤外，最近仲特別為旗下班合約藝員搞個《超級巨聲4之星夢傳奇》，俾班藝員一展歌喉，節目將會於7月正式出街。本周一（22日）至周三（24日），就有過百藝員輪住喺電視城訓練中心試音。
試音嘅評判有四位，包括無綫綜藝及音樂科高級經理陳家揚，監製麥鎮東。首日所見，唔少三、四線藝員同主播參加試音，大部分都唱得有板有眼，如魯振順、張景淳、郭田葰等。不過講到最勁都要數出過廣東碟嘅鬼妹陳明恩，佢唱Whitney Houston嘅〈I Will Always Love You〉，真係聽出耳油，好大機會晉身第二輪比賽。而明恩試音完後，就好謙咁話：「好緊張，我都有聽其他藝員唱歌，佢哋都好俾心機。（你出過碟好大機會入圍？）唔知呀，我都希望多啲機會喺TVB呢個平台唱歌。」咁識講嘢又好歌喉，入圍機會都好大。
好緊張呀！（真實對白）陳明恩話自己好緊張，應該係真㗎。事關見佢喺試音室等試音時，面口繃緊，睇得出佢真係好想入選。
陳明恩「歌齡」唔短㗎，事關09年，佢已經做蘇康演唱會嘉賓，兩人合唱〈來夜方長〉。
喺《天與地》入面飾演少年版家明嘅張景淳，仲拎埋自己嘅demo去試音。
