現年46歲嘅林憶蓮同35歲嘅恭碩良呢對姊弟戀已經係公開秘密，而且感情越嚟越穩定，佢哋上個禮拜仲一齊去加拿大多倫多舉行演唱會，寓工作於拍拖，據聞之後兩個人仲去咗蒙特利爾（Montreal）預支蜜月㖭。
噚日朝早5點，林憶蓮同恭碩良搭嘅CX829航班由多倫多返到香港，5點半左右戴住帽嘅恭碩良同林憶蓮，各自推行李車出閘。雖然兩個人同行但係就保持距離，顯得有啲避忌，之後憶蓮仲行先，不過佢忍唔住不時回頭望住男朋友笑，睇嚟心情非常愉快。
同居疑雲
落到停車場憶蓮嘅司機一早喺度等緊，佢哋見冇乜人嘅時候開始放下戒心有講有笑，恭碩良仲幫憶蓮搬行李，憶蓮就幫男友攞結他。開車冇耐司機發現有記者追訪，當去到憶蓮嘅赤柱舂坎角屋企，已經有保安開定閘畀憶蓮架車入去，保安仲叫記者唔好影相。
恭碩良同林憶蓮出閘之後特登保持距離扮冇嘢。
早排曾有傳憶蓮同恭碩良已經發展到同居關係，不過有讀者報料就話憶蓮為咗方便見面，只係喺屋企附近租咗屋畀男友住。
from:
http://hk.apple.nextmedia.com/entertainment/art/20130411/18223697
