霉咗多年嘅蕭正楠近排憑無綫劇《仁心解碼II》中飾演「哨牙仔」大翻身，弊在人紅多是非。上個禮拜六先36歲生日嘅蕭正楠，噚日有消息話佢喺葵涌區買咗層樓同女友何傲芝同居，但依然被何爸爸嫌窮。
蕭正楠噚日以乞兒look開工，佢話自己同何世伯見過一次面，關係算友好。有指何父（中）希望何傲芝（右）同何傲兒釣金龜，所以對蕭正楠印象麻麻。
自稱關係好
噚日馮仁昭喺將軍澳電視城見到蕭正楠，佢否認同何傲芝拍拖：「我哋係好朋友。」蕭正楠話喺微博知道單新聞，算係一份好大嘅生日禮物，佢又自爆見過何父，當時大家好好傾，世伯仲教佢好多馬嘅知識，又話雙方關係友好。講到被何父嫌窮，蕭正楠話：「一個爹哋想自己個女嫁得好當然無可厚非，自己唔會唔開心，仲會勤力啲搵錢做嘢。」
而何傲芝本來都喺電視城開工，不過就唔見人，佢透過電話強調唔回應私人感情，但係對報道咁樣講爹哋感到好唔開心，何傲芝指爹哋一向畀好大自由度佢哋兩姊妹，又學晒男友口脗話：「我哋係好朋友，佢生日當日自己同埋陳敏之、黃長興送咗個有『Best Actor』字樣嘅蛋糕畀佢。」
from:
http://hk.apple.nextmedia.com/entertainment/art/20130326/18207272
