周麗淇與「紗廠太子爺」Eric舊情復熾，而她的舊愛鄭嘉穎則搵錢至上，轉戰內地拍劇愈戰愈勇。近日他在寧波趕拍內地劇《華胥引》，緊接6月再到上海拍劇集《葉問2》。雖然忙到甩轆，但據知鄭嘉穎已私下答應樂易玲年底回巢TVB拍劇，幫娘家度過難關。
鄭嘉穎為了加速完成《華胥引》，決定開turbo，叫劇組編「特更」之外，連放飯時間都縮短。上月尾（23日），本刊在寧波象山影城內拍得鄭嘉穎的「粉樣」造型。他更以四萬元人仔月租私伙「流動休息車」，讓自己在內喪食喪扯煙，比起周潤發當年拍《黃金甲》專用的貨車睡房更型更豪。拍一套劇賺成千萬的鄭嘉穎，果然識嘆。
憑內地劇《步步驚心》紅爆內地的44歲鄭嘉穎，早前推掉《步2》，反而以35萬人仔一集酬勞接拍內地古裝劇《華胥引》，飾演20多歲的蘇譽，近日在寧波象山影城趕工。單是演出這套劇，他已穩賺1,400萬人仔。
Fans圍住影
拍完一場戲，鄭嘉穎諗住上車小休一會，不過失驚無神有班fans要求合照，他即時撥髮營造chok樣任影，來者不拒。
包車連司機
巨大如十六座小巴的「流動睡房」，連司機（小圖）月租4萬蚊人仔，由於鄭嘉穎拍攝無定時，要包埋司機的酒店住宿，果然夠豪。
日開十六粒鐘
鄭嘉穎為了緊接6月開拍的內地劇《葉問2》，想盡辦法加快《華》劇拍攝進度，主動要求劇組編「特更」。知情人士透露：「嘉穎拍之前已同導演講明，辛苦啲唔緊要，最緊要五月底前拍完，叫導演同劇組講，個rundown唔使太遷就佢，可以去盡啲，一日開十六個鐘都冇問題。」
上月23日，記者在寧波象山影城發現一架比十六座小巴還要大的休息車停泊在內。記者透過車窗，看到身穿古裝的鄭嘉穎獨自在車內吃飯。原來他為了方便拍攝及等埋位時可以盡量休息，專登自費4萬人仔月租這架休息車。現場所見，鄭嘉穎狼吞虎嚥十分鐘，把飯盒吃光，之後用熱毛巾抹面，再嘆番杯熱茶，非常滋陰。隨後他點起飯後煙狂扯，樣子極度享受。放飯時間不足20分鐘，鄭嘉穎又要繼續開工。
撩牙扯煙逐格睇
為爭取時間嘆飯後煙，鄭嘉穎在休息車食飯食得好急，但都仲記得用牙線清潔牙齒。
拍攝咁辛苦，相信鄭嘉穎最享受就是「飯後一支煙」的重要環節。見他深深吸一口，手勢純熟，不過成架車肯定布滿煙味。都係嗰句，吸煙危害健康呀！
飯廳凌亂
鄭嘉穎的「私人睡房」內，雜物非常多，單單在枱面的煙灰缸、紙巾盒等已佔去枱面的一半，梳化亦放了毛公仔及咕𠱸。咁凌亂，似乎佢唔預招呼其他朋友喎！
成車毛公仔
《華胥引》女主角蔣欣憑《後宮甄嬛傳》華妃一角大紅，今次與鄭嘉穎對手戲不多，但兩人未埋位前都有傾有講，相當熟落。
這架休息車內有乾坤，記者曾經在車外窺看內裏間隔陳設，發現內裏是一廳一房，「實用面積」超過一百二十呎，客飯廳有一張枱仔及梳化，旁邊更有小酒吧櫃。估不到的是，堂堂大男人鄭嘉穎，竟然如女孩子般放滿毛公仔，相信是內地fans所送。除了梳化外，房內有一張3×6呎單人牀，等埋位前，鄭嘉穎定必在內休息夠本。
年底回巢拍劇
據知，無綫製作資源部總監樂易玲最近親自致電鄭嘉穎，要他度期回巢。還有幾套劇要還的鄭嘉穎，初步答應年底會返無綫拍劇，為近年無綫小生花旦四散而救亡。知情人士透露：「依家連陳展鵬都做主角，但收視反映出嚟真係未夠火候，TVB自知好唔夠人孭飛。不過嘉穎都算有情有義，仲記得全靠樂小姐關照先有今日，所以樂小姐開到聲，佢拍晒心口應承年底會返TVB。」為此記者曾致電樂易玲，惟至截稿前仍未獲回覆。
巨星級享受
外地取景拍攝，通常都遠離酒店，來回閒閒哋三幾粒鐘，要爭取時間休息，冇嘢好得過「流動睡房車」。不過呢種享受一般只係巨星至有，鄭嘉穎認真識嘆。
發哥瞓超豪旅遊巴
06年6月，周潤發到橫店拍攝電影《滿城盡帶黃金甲》，其座駕外觀如普通旅遊巴，內裏其實酒店房一樣，廳房、洗手間和電視齊備，發嫂同行都唔怕悶啦。
李連杰改裝保母車
05年5月，李連杰在上海拍攝電影《霍元甲》，將原本可坐十二人的保母車改裝，變成一間有牀有按摩椅的睡房。
成龍住貨櫃車
03年4月，成龍在德國拍《八十日環遊世界》，專登將大貨櫃車改裝成一私家屋，面積超過五百呎，大到可以招呼朋友，其中在該片演大反派的莫文蔚就是常客。
