上一期《忽周》率先踢爆蒙嘉慧秘密簽咗王維基嘅香港電視，但佢為咗抬高身價，竟然瞞住無綫高層樂易玲，仲公開話自己會考慮同娘家續約咁話！可惜東窗事發吖，你當人哋係水泡，人哋樂小姐都唔係傻豬！
對付「反骨仔」，最緊要決絕。媽咪姐就收到風，蒙嘉慧雖然有新劇《仁心解碼Ⅱ》在手，但無綫已經透過該劇監製羅永賢，通知對方唔使幫手宣傳，《TVB周刊》亦臨時取消為蒙嘉慧影雜誌封面，可謂全面封殺。
最難頂係有人仲懶係義氣仔女咁講：「呢一刻我仲係無綫員工，我會尊重公司決定。」嘩！真係好識講嘢，唔通蒙嘉慧又係「梁粉」？
老婆我撐你！（設計對白）
老公伊健日前出席活動開聲撐老婆，更指無綫冇人情味。
《忽周》上期率先報道蒙嘉慧過檔香港電視嘅消息。高層樂易玲當時亦蒙在鼓裏，聽到消息後表現愕然。蒙嘉慧有份主演嘅《仁心解碼Ⅱ》即將播映，不過蒙因過檔一事被無綫封殺，禁止為劇集做宣傳。
