現年29歲嘅李彩華（Rain）身邊男伴好似走馬燈咁，可以見到佢真係好有魅力，佢嘅愛情生活明顯比佢嘅事業精采。早前情人節佢仲喺微博擺收花相晒命。日前佢返北京喺首都機場仲俾人發現有富二代新歡接機，個男仔又搭膊又幫手攞行李，做完觀音兵之後就俾人起埋底，據聞係國內富二代，叫萬思維，現年31歲，佢嘅家族坐擁幾億身家，從事煤礦同房產生意。
身邊經常出現不同男伴嘅Rain，今趟又有富貴男揸住480多萬嘅Mclaren跑車接送，真係夠晒豪呀。四眼男所揸嘅跑車，登記車主姓盧。
食飯嗰陣，四眼男除低眼鏡同李彩華邊食邊傾。谷媽媽抱住相信係谷祖琳嘅囡囡出嚟送客。
富二代萬思維（圖）早前喺北京俾人影到同李彩華好親密。資料圖片
駕480萬名車
不過呢位萬先生唔係冇對手，因為前日Rain就同另一個男士，坐住架價值成480多萬嘅Mclaren兩座位跑車，去咗大坑同谷祖琳兩公婆一齊食飯。
前晚大約9點鐘，Rain同呢位四眼男同小谷兩公婆喺大坑小谷媽咪開嘅中菜館食飯。見佢哋四個人食得好開心，仲不停交談就知佢哋有幾熟。餐飯食到差不多10點，小谷老公就行去收銀處，睇嚟呢餐係佢負責找數。作為半個主人家，小谷負責送Rain同四眼男出門口，準備上番泊喺門口嗰部橙色Mclaren跑車，Rain見到記者就話同朋友食飯，臨走仲揮手拜拜㖭。
from:
http://hk.apple.nextmedia.com/entertainment/art/20130314/18194319
