現年三十一歲的李彩華（Rain）十四歲出道由模特兒做起，之後經歷為父還債、雪藏及解約，發生在她身上的事猶如苦情戲的劇本；這麼多年來，在身邊擦身而過的藝人跨越幾個年代，三年前她在內地拍攝劇集《回家的誘惑》才成功彈起，不但見到另一片天，還坐擁八千萬身家成小富婆，Rain感觸寄語新人：「喺呢個圈唔好諗住同人鬥快紅，係要鬥長命！」
撰文：鄉奈仁
憑內地劇集《回家的誘惑》，Rain成功彈出。
劇照
入行十七年的Rain，當年一心想當模特兒，之後被黃柏高羅致成為歌手，可是發展並不理想，最後解約收場，未料轉會寰宇再次遇上合約糾紛，被雪藏加上要為父還債，本來廿幾歲是走偶像路線的藝人黃金期，Rain卻跌得損手爛腳，她日前接受專訪時說：「當時真係好徬徨，唔知點樣可以行落去，對人嘅信任又少咗，但既然冇得揀只能向前行，就惟有邊行邊諗辦法。」
李彩華深信人人頭上一片天。
「同媽咪失聯三日」
為尋求出路，Rain當日選擇回內地拍劇，說到當年Rain仍百般滋味在心頭，她說：「最初真係好多嘢都唔慣，但係唔會有人得閒同你解釋，好多嘢都要自己執生，試過喺橫店拍戲，一覺瞓醒四周冇人，得番自己同助手兩個，原來黃金週之後嗰度係冇人，電話充值卡冇曬錢，同媽咪失聯咗三日，嚇到佢喺香港喊。」她又說：「當年仲係新人，所以每日開工都唔敢問通告點安排，總之每日準時到現場等，試過拍一部劇，等咗好多人都未有拍到我嘅戲份，後來先知嗰場戲要等落雪先拍得，有日瞓醒見到落雪好開心，點知嗰日劇組係休息，心裡面覺得好委屈，匿埋喊但唔敢同媽咪講。」
不過，Rain承認娛樂圈會令人加速成長，思考模式跟同齡的圈外人很不同，她又寄語新人要令自己開心，亦不要跟別人比較，她又相信只要肯努力，人人頭上一片天：「喺呢個圈唔好諗住同人鬥快紅，係要鬥長命，只要捱得過就會有回報！」而Rain亦於三年前得到她的回報，她憑內地劇集《回家的誘惑》冒出頭，酬勞隨即以倍數遞增，目前已擁八千萬物業成為小富婆。Rain說：「咁都要多謝媽咪幫我投資買樓，因為自己喺呢方面真係白紙一張。」
早前Rain帶父母到杜拜豪玩。
維護父親非賭徒
早前Rain趁放假做孝順女，請雙親往杜拜豪使豪玩，畢竟過去多年為父還債令她捱了不少苦頭，問Rain如何形容她與父親的感情？她說：「其實由頭到尾都冇嬲過爸爸，嗰時係會諗自己點解會咁慘，做嚟做去就係為咗還債，唔通一世就係咁？」她又維護爸爸說：「爸爸嗰時因為生意失敗，諗歪咗先去賭錢，佢絕對唔係賭徒。」
場地提供：香港飯堂
Rain表示回港到名店購物，是要獎勵自己。
資料圖片
名店濕平當獎勵
Rain雖然不是經常在港，但每次返港都常被傳媒發現她出入名店shopping，Rain哈哈笑言：「個個女仔都鍾意買衫買手袋，我覺得辛苦做嘢都應該適當咁獎勵嚇自己，咁樣先至有動力繼續做嘢嘛！」Rain又自爆每次返香港，除咗買衫同手袋，例必會去大擦一餐，難怪Rain得悉訪問在懷舊茶餐廳進行後十分雀躍：「開工要keep住個樣同身形，食多啲飲多啲都驚肥怕腫，返嚟香港就可以放縱嚇，最鍾意食麵包、西多士。」果然，訪問結束，Rain又食又拎！
from:
http://hk.apple.nextmedia ... 150206/19030611
